ხარძიანის საქმეს უფრო სერიოზული პასუხი სჭირდება, ვიდრე მივიღეთ ვაზაგაშვილის საქმეზე- ხიდაშელი

პოლიტიკა - 18:29, 31 Mar, 2015

1659

საპარლამენტო უმრავლესობის წევრმა თინა ხიდაშელმა განაცხადა, რომ ბესიკ ხარძიანის საქმეს ბევრად უფრო სერიოზული პასუხი სჭირდება, ვიდრე საზოგადოებამ მიიღო იური ვაზაგაშვილის მკვლელობაზე. თინა ხიდაშელის თქმით, იური ვაზაგაშვილის და ბესიკ ხარძიანის მკვლელობები არის ყველაზე დიდი გამოწვევა, რომლის წინაშეც საქართველოს ახალი ხელისუფლება დადგა.

„იურა ვაზაგაშვილის და ბესო ხარძიანის მკვლელობა არის, ყველაზე დიდი გამოწვევა, რომლის წინაშეც ჩვენი ახალი შს მინისტრი და პროკურატურის გუნდის ახალი შემადგენლობა დადგა. მაქვს დიდი იმედი, რომ ორივე საქმე სათანადოდ გამოძიებული იქნება და არ დარჩება კითხვის ნიშნები ამ საქმეებთან დაკავშირებით, იმედი მაქვს დაისჯებიან როგორც შემსრულებლები, ასევე შემკვეთები. ასეთი მკვლელობები ასე, რომ დილით ვიღაცამ გაიღვიძა ცუდ ხასიათზე და ტყვია გაისროლა, არ ხდება. ამ საქმეს სჭირდება გაცილებით უფრო სერიოზული პასუხი, ვიდრე ჩვენ მივიღეთ იური ვაზაგაშვილის მკვლელობაზე, დარწმუნებული ვარ, რომ საქართველოს პროკურატურა და შინაგან საქმეთა სამინისტრო ნათელს მოჰფენს ამ საქმეებს", - განაცხადა თინა ხიდაშელმა.

ხიდაშელის თქმით, ამ საქმის გამოძიებას აქვს დიდი მნიშვნელობა, რომ არავის გაუჩნდეს დანაშაულის ჩადენის შემთხვევაში დაუსჯელად დარჩენის იმედი.