რუსული „რბილი ძალის“ ამოცანა დასავლური ღირებულებების დისკრედიტაციაა

რუსული „რბილი ძალის“ ამოცანა დასავლური ღირებულებების დისკრედიტაციაა - პრეზიდენტი

პოლიტიკა - 15:11, 31 Mar, 2015

1264

საქართველოს პრეზიდენტის განცხადებით, საქართველოს, უკრაინისა და მოლდოვას კრემლმა ევროპული არჩევანის გამო დასაჯა. ამის შესახებ გიორგი მარგველაშვილმა პარლამენტში წლიური ანგარიშით გამოსვლის დროს ისაუბრა. პრეზიდენტის განცხადებით, რუსეთთან ურთიერთობის განსამუხტად საქართველოს აქტიური საერთაშორისო დახმარება სჭირდება და მხოლოდ ცალკეულ კრიზისებზე მსჯელობა საკმარისი არაა.

„საქართველო ესწრაფის რუსეთთან თანასწორობის პრინციპზე დაფუძნებულ კეთილმეზობლურ ურთიერთობას, ჩვენი პარტნიორები უნდა ხედავდნენ, რომ ცდას არ ვაკლებთ რუსეთთან ურთიერთობების განსამუხტავად და ამ ძალისხმევაში უფრო მეტი საერთაშორისო დახმარება გვესაჭიროება. საჭიროა დამოუკიდებელი სახელმწიფოების თავისუფალი არჩევანის, სუვერენიტეტისა და ტერიტორიული მთლიანობის წინააღმდეგ მიმართული პოლიტიკის გაუვნებელყოფა. ევროპული უსაფრთხოების განახლებულ არქიტექტურაზე მსჯელობისას სრულადაა გასათვალისწინებელი ნატოს არაწევრი ევროპული სახელმწიფოების უსაფრთხოების პრობლემატიკა“,- აცხადებს პრეზიდენტი.
გიორგი მარგველაშვილის თქმით, რუსეთის მიერ გლობალური მასშტაბით გაშლილი პროპაგანდისტულ-იდეოლოგიური კამპანიის ერთ-ერთი ობიექტი საქართველოცააა.

„რუსული „რბილი ძალის“ ამოცანა დასავლური ღირებულებების დისკრედიტაცია და საქართველოს მიერ ევრო-ატლანტიკურ ინტეგრაციაზე უარის თქმაა. ამაში იგი ადგილობრივი ანტიდასავლური ძალების კონგლომერატს იყენებს. ამ შემოტევის შესაჩერებლად აუცილებელია ქვეყნის შიგნით პროდასავლური დღის წესრიგის კონსოლიდაცია და კოორდინირებული მუშაობა ჩვენს დასავლელ პარტნიორებთან“,- განაცხადა მარგველაშვილმა.