უმცირესობათა დაცვა თითოეული სახელმწიფო მოხელის კონსტიტუციური ვალდებულებაა

უმცირესობათა დაცვა თითოეული სახელმწიფო მოხელის კონსტიტუციური ვალდებულებაა - პრეზიდენტი

პოლიტიკა - 14:30, 31 Mar, 2015

1278

საქართველოს პრეზიდენტმა პარლამენტში ყოველწლიური გამოსვლისას ადამიანთა უფლებებზეც ისაუბრა და განაცხადა რომ ყველა ადამიანი დაბადებით თავისუფალია და კანონის წინაშე თანასწორია. ამიტომ უმცირესობის უფლებათა დაცვა თითოეული სახელმწიფო მოხელის პირდაპირი და უპირობო კონსიტუციური ვალდებულებაა.

„უმცირესობის უფლებათა დაცვა თითოეული სახელმწიფო მოხელის პირდაპირი და უპირობო კონსტიტუციური ვალდებულებაა. კანონმდებლები მარტონი არ არიან, ვისაც ეს პასუხისმგებლობა აკისრია. საჭიროა, ხელისუფლების შესაბამისი ორგანოების სწორი, ეფექტური მოქმედება, რომელიც მკაფიოდ განაცხადებს, რომ სახელმწიფო, უფლებათა ხელყოფის უმცირეს გამოვლინებასაც კი არ შეიწყნარებს“, - განაცხადა პრეზიდენტმა.

მისივე თქმით, ხელისუფლებამ ამავე დროს, დისკრიმინაციის წარმომშობ მიზეზთა აღმოფხვრა მიზნად უნდა დაისახოს.

„პრობლემა ხომ არა მხოლოდ უშუალოდ ძალადობაა, არამედ აზროვნების ის ფორმა, რომლითაც პოლიტიკურ, რელიგიურ თუ სხვა შეხედულებათა, სექსუალური ორიენტაციის, ავამდყოფობის, შეზღუდულ შესაძლებლობათა თუ ქრომოსომების რაოდენობის გამოც კი, ადამიანთა დისკრედიტაცია და სტიგმატიზება ხდება“, - აღნიშნა გიორგი მარგველაშვილმა.
_{ნინო ზედგენიძე}