,,დემოკრატიული განვითარების ეროვნული ცენტრის“ თავმჯდომარის მუხრან ბურჭულაძის თქმით, მთავრობა გადადგომის შესახებ მოთხოვნას მომავალში ყოველი ოჯახიდან გაიგებს. ბურჭულაძის განცხადებით ამ მოთხოვნას რამდენიმე საფუძველი აქვს, ეს არის შექმნილ მძიმე ეკონომიკურ მდგომარეობა, კრიმინალის გაზრდადა ჯარში არსებულ პრობლემები.

„21-მა ჩაიარა, ხალხი შინ იმ იმედით დაბრუნდა, რომ ხელისუფლებაში ცვლილებები იქნებოდა, თუმცა ხადური კვლავ ციკანს მიირთმევს, წულუკიანი განაგრძობს უცხოელების დევნას და რასიზმის ნერგვას, მოტყუებული წნევიანი პენსიონერი კი რეცეპტის რიგში დგომას. ხალხს კვლავ ემუქრება შიმშილი, ძლიერი თავდაცვის გაძლიერების ნაცვლად ორი წელია ვისმენთ, რომ ჯარს დიარეა აწუხებს, პოლიტიკოსები თუ ბიზნესმენები ქრებიან, ქვეყანა კრიმინალის ჭაობში ეფლობა. "უკეთეს" შედეგს ხომ პუტინი ვერც ინატრებდა.

არშემდგარი პრემიერის აზრით, ათასობით ქართველი დაშინებული და მოსყიდულია. მას ჰყოფნის თავხედობა, ძალაუფლება ქართველ ერზე ძალადობით და უზნეობით შეინარჩუნოს.

21 მარტს ჩვენ ვაჩვენეთ მტერსაც და მეგობრებსაც, თუ რა ფასეულობები აქვს ქვეყანას და მაგალითი იმისა, თუ როგორ ცდილობს პრობლემის გადაჭრას ევროპელი ხალხი. თუმცა სამწუხაროდ მთავრობამ ვერ უპასუხა საკუთარ ხალხს ამავე გზით და პირიქით - გაემიჯნა მას. პრემიერის პასუხი იყო აბსოლუტურად არაადექვატური, მან აირჩია ხალხთან დაპირისპირების გზა. ის ვერ აცნობიერებს თუ რამდენად საშიშია უზნეობა და საკუთარი ხალხის შეურაცხყოფა. მან ვერ გაიგო მთავარი - რომ მთავრობა რომლის ნაბიჯები არ პასუხობს ხალხის მოთხოვნას, უნდა წავიდეს. ღარიბაშვილს არ ესმის, რომ არათუ ათასების და ათიათასების, არამედ თითოეული ქართული ოჯახისა და თითოეული საქართველოს მოქალაქის სიტყვა ანგარიშგასაწევია, რადგან ესაა ჩვენი ქვეყნის ძირითადი ფასეულობა - ადამიანი, მისი უფლება და ინტერესი.

პროცესი დაწყებულია და ამას ვეღარაფერი შეაჩერებს - ოკუპანტის მარიონეტი, ქვეყნის დამაქცევარი და გლეხის ლუკმით გამძღარი მთავრობა უნდა წავიდეს. ამ მოთხოვნას ხშირად გაგაგონებთ ყოველი კუთხიდან, სოფლიდან თუ ოჯახიდან!“, - აცხადებს ბურჭულაძე.