საპარლამენტო უმრავლესობის დეპუტატი გუგული მაღრაძე მიიჩნევს, რომ ბიზნესმენ ბესიკ ხარძიანის გარდაცვალება შეკვეთილი მკვლელობაა.

მისი თქმით, ეს მკვლელობა სხვა ბიზნესმენებისთვის გამაფრთხილებელი სიგნალია.

როგორც მაღრაძემ აღნიშნა, ხარძიანის მკვლელობა არის ძალიან ნიშანდობლივი იმ გაგებით, რომ იგი სერიოზული ბიზნესმენი იყო და გარშემო სერიოზული წრე ჰყავდა.

„ხარძიანმა საკუთარი ქონების დაბრუნების პირველი ეტაპი მოიგო. რატომღაც ძალიან გაიწელა მეორე ეტაპი და ამ შუალედში შეკვეთილი მკვლელობა მოხდა. აუცილებლად ეს არის შეკვეთილი მკვლელობა იმიტომ, რომ ამით გარკვეული ძალები მიუთითებენ იმაზე, რომ შეიძლება სასამართლომ გაგამართლოს, ქონება დაგიბრუნოს, მაგრამ ჩვენ შეგვიძლია სიცოცხლე მოგისპოთ. ეს თითქოს გამაფრთხილებელი სიგნალია ყველა სხვა ბიზნესმენისთვის“, - განაცხადა გუგული მაღრაძემ.

ბესიკ ხარძიანს 28 მარტს საკუთარ სახლთან ესროლეს. ის მიყენებული ჭრილობების შედეგად საავადმყოფოში გარდაიცვალა. მომხდარზე გამოძიებას პროკურატურა აწარმოებს. ფაქტზე აღძრულია საქმე სისხლის სამართლის კოდექსის 108-ე მუხლით, რაც განზრხა მკვლელობას გულისხმობს.