ბესიკ ხარძიანის მეგობრებს კვალიფიციური გამოძიების იმედი არ აქვთ

პოლიტიკა - 14:57, 30 Mar, 2015

1657

მოკლული ბესიკ ხარძიანის მეგობარმა ბიზნესმენმა დავით ბეგიაშვილმა განაცხადა, რომ მას საქმეზე კვალიფიციური გამოძიების ჩატარების იმედი არ აქვს. ბეგიაშვილის თქმით, პროცესების სწორად წარმართვისთვის საზოგადოების ჩართულობა არის საჭირო და მკვლელობის საქმეში გია უდესიანის მონაწილეობას არ გამორიცხავს.

ბიზნესმენი ხარძიანის მკვლელობის საქმეში ხელისუფლების დანაშაულის შესახებაც საუბრობს.

„არ არის გამორიცხული, რომ ამ საქმეში უდესიანი ფიგურირებდეს. ეს უნდა დაადგინოს გამოძიებამ. ამ ვითარებაში ნაკლებ სავარაუდოა, რომ ეს პროცესი, გამოძიება წარიმართოს ისე, როგორც საქმეს სჭირდება, ამიტომ არის საჭირო საზოგადოების ჩართულობა, რომ ეს პროცესი ბოლომდე მივიდეს.

მეგობრები და ნათესავები შემართებით ვართ განწყობილები, უფრო რადიკალურ ნაბიჯებს გადავდგამთ. აქამდე ჩვენ კანონმორჩილები ვიყავით. ჩვენ ხელისუფლების „კეთილ ნებას“ ველოდებოდით და სამწუხაროდ, ეს ნება დღემდე არ ჩანს, ტერორი მიმდინარეობს. ჩვენ ვაიძულებთ ხელისუფლებას, რომ გადადგას ნაბიჯები ამ პროცესის დასაწყებად,“ - განაცხადა დავით ბეგიაშვილმა.

შეგახსენებთ, რომ ბესიკ ხარძიანს ორი დღის წინ საკუთარ სახლთან ესროლეს. ის მრავლობითი ცეცხლნასროლი ჭრილობებით რეპუბლიკურ საავადმყოფოში გარდაიცვალა.