ზვიად ჯანყარაშვილის ადვოკატები მოკლული ბიზნესმენის ბესო ხარძიანის მეგობარს ირაკლი კორძაიას უპირისპირდებიან. ადვოკატები სთხოვენ კორძაიას, რომ ერთი კვირის განმავლობაში წარმოადგინოს მტკიცებულებები, რომელიც ჯანყარაშვილი-უდესიანის საერთო ინტერესებ და ბიზნესკონტაქტებს დაადასტურებს.

წინააღმდეგ შემთხვევაში ისინი სასამართლოში კორძაიას წინააღმდეგ სარჩელს შეიტანენ.

„ეს არის ზვიად ჯანყარაშვილის მიზანმიმართული დისკრედიტაცია, რომელიც შეიძლება სადღაც დაიგეგმა. ამას ალბათ გამოძიება გვიჩვენებს. მას შემდეგ რაც მთავრობის ადმინისტრაციამ ამასთან დაკავშირებით გაავრცელა განცხადება, ირაკლი კორძაიამ თუ არ უარყო ეს ინფორმაცია, მან უფრო განავრცო ეს თემა და განაცხადა, რომ მას შესაბამისი მტკიცებულებები აქვს“, - განაცხადა ადვოკატმა დიმიტრი გაბუნიამ.

ირაკლი კორძაიას განცხადებით, ბესიკ ხარძიანისთვის წართმეული ბიზნესის დაბრუნებას „ოცნების“ ხელისუფლების ყოფილი მაღალჩინოსნებიც სპეციალურად აფერხებდნენ, ამასთანავე კორძაიას შეფასებით, მნიშვნელოვანი საფუძველი გააჩნია ოჯახის ეჭვებს იმასთან დაკავშირებით, რომ მკვლელობასთან კავშირი გია უდესიანს აქვს.

„უდესიანის გვარის გარდა ამ საქმეში მართალია ფარულად მაგრამ გამოჩნდა სხვა გვარებიც, ეს გვარებია ლაშა ნაცვლიშვილი, რომელიც ხელოვნურად აყოვნებდა ამ პროცესს, ეს არის ბატონი ჯანყარაშვილი რომელსაც აქვს პირდაპირი ბიზნესინტერესები უდესიანთან“, - განაცხადა კორძაიამ.