საიდუმლო თემებზე საჯაროდ საუბარი, ქვეყნის უსაფრთხოებას ზიანს მოუტანს- ჯანელიძე ალასანიას

პოლიტიკა - 12:14, 30 Mar, 2015

1617

თავდაცვის მინისტრი მინდია ჯანელიძე მისი წინამორბედის მიერ გაკეთებულ განცხადებას გამოეხმაურა და განაცხადა, რომ საფრანგეთსა და საქართველოს შორის საჰაერო თავდაცვის შესახებ დოკუმენტი რაზეც ირაკლი ალასანია საუბრობს ბუნებაში არ არსებობს.
"არანაირი ხელშეკრულება ბუნებაში არ არსებობს. არაფერს არ ეწურება ვადა, პროცესი მიმდინარეობს ჩვეულ რიტმში, წარმატებით, ყველა ნაბიჯი, რაც საჭიროა ჩვენი ქვეყნის თავდაცვითი შესაძლებლობების გასაუმჯობესებლად, იდგმება,“ - აცხადებს ჯანელიძე.

ჯანელიძის შეფასებით საიდუმლო თემებზე ღიად და საჯაროდ საუბარი ზიანს მოუტანს ქვეყნის უსაფრთხოებას და თავდაცვის ინტერესებს.

„მინდა გითხრათ, რომ პროცესი მიმდინარეობს წარმატებით. ყველა ნაბიჯი რაც საჭიროა ჩვენი ქვეყნის შესაძლებლობის გასაუმჯობესებლად გადაიდგას, იდგმება. რაც უფრო მეტს ვილაპარაკებთ ამ საკითხებზე მით უფრო დაზიანდება ქვეყნის თავდაცვის ინტერსები. სრული პასუხისმგებლობით ვაცხადებ, რომ ჩვენ ნაბიჯებს ვდგამთ მხოლოდ წინ. მათ შორის საჰაერო შესაძლებობების განვითარების კუთხით. ჩვენ გვაქვს ბევრი გამოწვევა თავდაცვისა და უსაფრთხოების სფეროში და ყოველი ზედმეტი სიტყვა, მითუმეტეს საიდუმლო თემებზე ღიად და საჯაროდ საუბარი მხოლოდ ზიანის მომტანია ჩვენი ქვეყნის უსაფრთხოებისთვის. ამიტომ ყველას მოვუწოდებ, რომ თავი შეიკავონ და ცოტა მეტი პასუხისმგებლობით მოეკიდონ ამ საკითხებზე საუბარს“, - აღნიშნა ჯანელიძემ.

შეგახსენებთ, ირაკლი ალასანიას განცხადებით მისი თავდაცვის მინისტრის პოსტზე ყოფნისას, საქართველოსა და საფრანგეთს შორის საჰაერო უსაფრთხოების მემორანდუმზე ხელმოწერა უნდა მომხდარიყო. საფრანგეთში ვიზიტად მყოფ ირაკლი ალასანიას სახელმწიფო უსაფრთხოებისა და კრიზისების მართვის საბჭოს მაშინდელმა ხელმძღვანელმა, მინდია ჯანელიძემ დაურეკა და პრემიერ-მინისტრ ირაკლი ღარიბაშვილის სიტყვები გადასცა. როგორც ალასანიამ აღნიშნა, პრემიერის სიტყვების თანახმად, მას საჰაერო თავდაცვის შესახებ მემორანდუმისთვის ხელი არ უნდა მოეწერა.