"საგარეო უწყება თავდაცვის სამინისტროსა და საფრანგეთს შორის მოლაპარაკებებში ჩართული არაა"

პოლიტიკა - 11:24, 30 Mar, 2015

1227

საგარეო საქმეთა სამინისტროს პრესპიკერის დავით კერესელიძის ინფორმაციით, საქართველოში საჰაერო უსაფრთხოების შეიარაღების განთავსებასთან დაკავშირებით თავდაცვის უწყებასა და საფრანგეთს შორის მიმდინარე მოლაპარაკებებში საგარეო უწყება ჩართული არ არის.

ამის შესახებ კერესელიძემ დღეს გამართულ პრესკონფერენციაზე განაცხადა.

მისი თქმით, ეს არის მოლაპარაკებები საქართველოს თავდაცვის სამინისტროსა და საფრანგეთს შორის.

„გავმიჯნო კომპეტენციის ფარგლებში კითხვები. მე რამდენადაც ვიცი საგარეო საქმეთა სამინისტრო ასეთ მოლაპარაკებებში ჩართული არ არის. დანარჩენი დეტალები, თუ გაგიმხელენ, შეგიძლიათ თავდაცვის სამინისტროს ჰკითხოთ", - განაცხადა დავით კერსელიძემ.

შეგახსენებთ, ირაკლი ალასანიას განცხადებით მისი თავდაცვის მინისტრის პოსტზე ყოფნისას, საქართველოსა და საფრანგეთს შორის საჰაერო უსაფრთხოების მემორანდუმზე ხელმოწერა უნდა მომხდარიყო. საფრანგეთში ვიზიტად მყოფ ირაკლი ალასანიას სახელმწიფო უსაფრთხოებისა და კრიზისების მართვის საბჭოს მაშინდელმა ხელმძღვანელმა, მინდია ჯანელიძემ დაურეკა და პრემიერ-მინისტრ ირაკლი ღარიბაშვილის სიტყვები გადასცა. როგორც ალასანიამ აღნიშნა, პრემიერის სიტყვების თანახმად, მას საჰაერო თავდაცვის შესახებ მემორანდუმისთვის ხელი არ უნდა მოეწერა.

მინდია ჯანელიძე განცხადებით, მსგავსი ხელშეკურლება, რაზეც თავდაცვის ყოფილი მინისტრი საუბრობს, ბუნებაში არ არსებობს. თუმცა როგორც ჯანელიძე აღნიშნავს თუ საქართველოს მიეცემა შესაძლებლობა საფრანგეთთან გააფორმოს საჰაერო თავდაცვის შესახებ ხელშეკურლება, ამ ხელშეკრულებას მინისტრი ხელს მოაწერს.