მთავრობის ადმინისტრაცია ხარძიანის ახლობლების განცხადებაზე: დაუსაბუთებელი ბრალდებები მიუღებელია

პოლიტიკა - 17:10, 29 Mar, 2015

1801

მთავრობის ადმინისტრაციის პრესსამსახური საგანგებო განცხადებას ავრცელებს და მოკლული ბიზნესმენის ბესიკ ხარძიანის ახლობლების მიერ გაკეთებულ განცხადებებს ეხმაურება. ადმინისტრაცია მიიჩნევს, რომ ნებისმიერი დაუსაბუთებელი ბრალდება მთავრობის ყოფილი თუ მოქმედი წევრების მიმართ მიუღებელია.

"საქართველოს მთავრობის სახელით, გვინდა მწუხარება გამოვთქვათ ბიზნესმენ ბესო ხარძიანის მკვლელობის გამო და სამძიმარი გამოვუცხადოთ მის ოჯახს, ახლობლებს. მაღალი საზოგადოებრივი ინტერესიდან გამომდინარე, გვინდა განვაცხადოთ, რომ ბესო ხარძიანის საქმის გამოძიება ინტენსიურ რეჟიმში მიმდინარეობს, რათა უმოკლეს ვადებში მოხდეს დამნაშავის დადგენა და დასჯა. ამ დღეებში მომხდარზე ბევრი კომენტარი კეთდება სხვადასხვა სატელევიზიო ეთერში. გაისმა ბრალდებები მთავრობის ყოფილი და მოქმედი წევრების ამ საქმესთან შესაძლო კავშირის შესახებ. გვინდა მოვუწოდოთ ყველას, ბრალდების შემთხვევაში წარმოადგინონ კონკრეტული დოკუმენტური დასაბუთება, წინააღმდეგ შემთხვევაში, მათი ბრალდებები ჩაითვლება საქართველოს მთავრობისა და პრემიერ-მინისტრის მიზანმიმართულ დისკრედიტაციად. კატეგორიულად მიუღებელია დაუსაბუთებელი ბრალდებების მოსმენა იმ მთავრობის მიმართ, რომლისთვისაც მთავარ პრიორიტეტს სწორედ სამართლიანობის აღდგენა წარმოადგენს", - ნათქვამია მთავრობის ადმინისტრაციის განცხადებაში.