„გაერთიანებული დემოკრატიული მოძრაობის" ლიდერი ნინო ბურჯანაძე პრემიერის იმ განცხადების გამო აკრიტიკებს, სადაც ირაკლი ღარიბაშვილმა „ნაციონალების“ აქციაზე შეკრებილებს სექტა უწოდა.

როგორც ბურჯანაძემ „რეაქციაში“ განაცხადა, ხელისუფლებას არ აქვს უფლება საკუთარ მოსახლეობას სექტა უწოდოს.

„როგორ შეიძლება ხელისუფლებამ საკუთარ მოქალაქეებს, რაც არ უნდა მიუღებელი იყოს შენთვის მათი პოზიცია, სექტა უწოდო. ამ შეფასებას ვაპროტესტებ. შეიძლება ესე ფიქრობდე, მაგრამ როცა ხელისუფლების წარმომადგენელი ხარ, არ გაქვს უფლება, რომ საკუთარ მოსახლოებას ასე მიმართო. კეთილი ინებე და იმ სექტის წარმომადგენლებსაც დაელაპარაკე. წესიერად, რომ მოქცეულიყო „ქართული ოცნება“ ის ადამიანებიც არ მივიდოდნე აქციაზე. თუმცა პრობლემა არის ის, რომ „ქართული ოცნება“ თვითკმაყოფილებას არის მიცემული“, - განაცხადა ბურჯანაძე.

ირაკლი ღარიბაშვილი "ნაციონალური მოძრაობის“ მიერ 21 მარტს გამართულ აქციას გამოეხმაურა და მას სასაცილო უწოდა. პრემიერის განცხადებით, „ენმ“-ს ხალხის შეკრება მილიონობით ლარი დაუჯდა.

„ეს არის დემნოსტრირება იმის, რომ ეს ადამიანები არიან რაღაც გაუგებარი სექტა, რომლებიც არ არიან ორიენტირებულები ქვეყნის განვითარებაზე“ - განაცხადა ღარიბაშვილმა.