სპორტისა და ახალგაზრდულ საქმეთა მინისტრი ლევან ყიფიანი ადასტურებს, რომ სპორტის კომიტეტის წევრებთან გუშინდელი შეხვედრა ხმაურიანი იყო.

თუმცა ის შენიშვნებს არ იზიარებს და ამბობს, რომ მან ამ დროის განმავლობაში მოახერხდა და უწყება დეპოლიტიზირებული გახადა.

„რაც შეეხება დაძაბულობას, ეს ხდება ხოლმე. შესაბამისად, პასუხისმგებლობის საკითხი თუ დადგა ამის არ გვეშინია. თუ დაისვა შეკითხვა, მე მზად ვარ მთელი პასუხისმგებლობით ავიღო ყველა კითხვაზე პასუხი. ყველა მოთხოვნას რაც არგუმენტირებული იქნება, შევხვდები. მე მინისტრად არ დავბადებულვარ, მე მინისტრად მოვხვდი იმ გუნდის მეშვეობით, რომელიც დღეს ხელისუფლებაშია“, - განაცხადა ყიფიანმა.

შეგახსენებთ, სპორტის კომიტეტმა შესაძლოა მინისტრის, ლევან ყიფიანის გადაყენების პროცედურა დაიწყოს. როგორც ცნობილია, კანონმდებლები ყიფიანს გუშინ, სპორტის კომიტეტის დახურულ სხდომაზე შეხვდნენ. კომიტეტის წევრის ლუკა კურტანიძის თქმით, დეპუტატებს მინისტრთან ბევრი შეკითხვა აქვთ.