,,მივიღე გადაწყვეტილება... დავასახელო“ - კილაძე საგანელიძის სკანდალური საქმის დეტალებზე

პოლიტიკა - 16:50, 27 Mar, 2015

14036

გაზეთ „ქრონიკა +“-ის მთავარმა რედაქტორმა ელისო კილაძემ „ნიუპოსტთან“ საუბრისას განაცხადა, რომ იგი ეჭვქვეშ აყენებს გამოძიების შედეგებს, რომლის მიხედვითაც დავით საგანელიძის სამხედრო პოლიციასთან თაამშრომლობის შესახებ ინფორმაცია არ დასტურდება.

ელისო კილაძის თქმით, მან ამ საქმესთან დაკავშირებით დამატებითი ინფორმაცია მოიძია და უახლოეს დღეებში, საგანგებო ბრიფინგზე მას საზოგადოებას წარუდგენს. „ქრონიკა +“-ის რედაქტორი ასევე გეგმავს დაასახელოს იმ მაღალჩინოსნის ვინაობა, რომელმაც დავით საგანელიძის შესახებ გავრცელებული ინფორმაციის უტყუარობა დაადასტურა.

„ეს საქმე ორი წელი თაროზე იყო შემოდებული და პოლიტიკური გადაწყვეტილება იქნა მიღებული მხოლოდ მას შემდეგ, რაც მე ინტნსიურად დავიწყე წერა პრემიერ-მინისტრის ცოლის ნათესავების ბიზნეს-ინტერესებზე, უკანონო გარიგებებზე და მოგებულ ტენდერებზე. აქედან გამომდინარე, ვფიქრობ გამოძიება გახდა პოლიტიკური ზეწოლის მსხვერპლი.

რაც შეეხება გამოძიების დეტალებს, ჩემს მიერ გამოქვეყნებული იქნა ხელწერილის ასლი და ცხადია გასარკვევი იყო სად ინახებოდა დედანი, დოკუმენტში დასახელებულია იმ პირების ვინაობა, რომლებმაც გადაიბირეს დავით საგანელიძე, მათ შორის არიან მაღალჩინოსნები, რომლებიც იმყოფებიან ძებნაში. მაინტერესებს, როგორ დასრულდა გამოძიება ობიექტურად, თუ არ დაიკითხნენ ის პირები, რომლებიც დასახელებულნი არიან საგანელიძის გადამბირებელთა რიგებში?

რაც შეეხება იმას, რომ აგენტთა სპეციალური სიაში საგანელიძე არ ირიცხება, ეს ჩემთვის არგუმენტი არ არის. ჯერ ერთი, რომ წინა ხელისუფლების დროს, ძალიან დიდი მასალა გატნილი იქნა საქართველოდან და მეორე, ორი წელი ამ ინფორმაციის მიღებას ნამდვილად არ სჭირდებოდა. არ ვიცი, რომელი მინისტრის დროს მოხდა გამოძიებისთვის ამ მასალის გადაცემა, ეს მოხდა ირაკლი ალასანიას თუ მინდია ჯანელიძის დროს და ეს იქნება ჩემთვის ძალიან მნიშვნელოვანი დეტალი. მივიღე გადაწყვეტილება „ქრონიკა +“-ისა და მისი მთავარი რედაქტორის წინააღმდეგ ამ პოლიტიკური დემარშის შემდეგ, რომ საგანგებო ბრიფინგზე დავასახელო იმ მაღალი თანამდებობის პირის ვინაობა, რომელმაც წინასწარ იცოდა ამ მასალის გამოქვეყნების თაობაზე და რომელმაც მისი ძალიან ახლო ნათესავის საშუალებით დამიდასტურა, რომ ეს ინფორმაცია გახლავთ ნამდვილი,"-განაცხადა კილაძემ.

ელისო კილაძემ დაადასტურა ინფორმაცია იმის შესახებ, რომ მან გამოძიებას ნამდვილად მისცა ჩვენება და განაცხადა, რომ გამოძიებას მისთვის დამატებით კითხვები არ დაუსვამს.

„მე ვადასტურებ ამ ინფორმაციას, მაგრამ გამოძიებას ჩემთვის არ დაუსვამს კითხვები იმის თაობაზე, იცოდა თუ არა ვინმემ რამე დამატებით ამის თაობაზე, მე ვუპასუხე იმ კითხვას, რა კითხვაც დამისვა გამოძიებამ მასალის წარმომავლობასთან დაკავშირებით, მაგრა მე დამატებითი ინფორმაციაც მოვიპოვე, რომელსაც საზოგადოებას უახლოეს დღეებში გავაცნობ,“-განაცხადა ელისო კილაძემ.

შეგახსენებთ, რომ "ქრონიკა +"-ში გამოქვეყნდა დოკუმენტი, რომელის მიხედვითაც საპარლამენტო უმრავლესობის ლიდერი დავით საგანელიძე სამხედრო პოლიციასთან ფარულად თანამშრომლობდა. დღეს პარლამენტის უმრავლესობის ლიდერის აპარატმა განცხადება გაავრცელა, სადაც ნათქვამია, რომ ამ საკითხთან დაკავშირებით პროკურატურამ ჩაატარა გამოძიება და საგანელიძის სამხედრო პოლიციასთან კავშირი არ დადასტურდა.

ლაშა ჯაფარიძე