ევროკავშირში თავისუფალი გადაადგილება რიგის სამიტის შემდეგ მყისიერად არ მოხდება- ბერუჩაშვილი

პოლიტიკა - 09:57, 27 Mar, 2015

839

საქართველოს საგარეო უწყების ხელმძღვანელის თამარ ბერუჩაშვილის განცხადებით ევროკავშირთან უვიზო მიმოსვლა რიგის სამიტის შემდეგ მყისიერად არ მოხდება. მისი თქმით, საქართველოს მთავრობა ყველა პროცედურისა და მეთოდოლოგიის გათვალისწინებით მუშაობს, რაც ევროკავშირს სავიზო ლიბერალიზაციის პროცესში ჩართულ ქვეყნებთან მიმართებაში აქვს.

მინისტრის განმარტებით, ქართული მხარე ამ ეტაპზე ექსპერტების ანგარიშს ელოდება, რომელიც შემდეგ ევროკომისიის დასკვნით ანგარიშში აისახება.

"ჩვენ ვაკეთებთ ყველაფერს, რომ ეს ანგარიში იყოს პოზიტიური და გვქონდეს შესაბამისი პოლიტიკური მხარდაჭერა. რაც შეეხება პრაქტიკულ ნაბიჯებს, როდის მოახერხებენ ბიომეტრიული პასპორტის მქონე საქართველოს მოქალაქეები თავისუფალ გადაადგილებას ევროკავშირში, შენგენის ზონის ქვეყნებში, მინდა გავაკეთო განმარტება, რომ ეს არ მოხდება მყისიერად რიგის სამიტის შემდეგ. ეს საჭიროებს დამატებითი პოლიტიკური მხარდაჭერის მოპოვებას, ასევე პროცედურების გავლას. ამ ეტაპების გავლის შემდეგ შესაბამის დროს გადაწყვეტილებას მიიღებს ევროკავშირის წევრი ქვეყნების საბჭო", - განაცხადა თამარ ბერუჩაშვილმა.