საგარეო საქმეთა ყოფილი მინისტრი მაია ფანჯიკიძე თავდაცვის მინისტრს მინდია ჯანელიძეს არასანდო ადამიანს უწოდებს.

მისი თქმით, ჯანელიძემ რამდენჯერმე იცრუა.

„მინდია ჯანელიძე არასანდო ადამიანია, რომელმაც დილით თქვა, რომ არ დაურეკავს ალასანიასთან და საღამოს თქვა, რომ დარეკა, მაგრამ რაღაც სხვაზე. აქედან გამომდინარე, მე მისი არ მჯერა. მე კარგად ვიცი, რომ მან დაურეკა ირაკლი ალასანიას და არ უნდოდა განეხორციელებინა ის საქმე, რისთვისაც იყო წასული პარიზში“, - განაცხადა ფანჯიკიძემ.

"თავისუფალი დემოკრატების" ლიდერმა ირაკლი ალასანიამ რამდენიმე დღის წინ განაცხადა, რომ თავდაცვის მინისტრის რანგში საფრანგეთში ვიზიტის დროს მას მინდია ჯანელიძემ დაურეკა და უთხრა, რომ საჰაერო უსაფრთხოებისთვის შეთანხმებაზე ხელი არ მოეწერა. ჯანელიძემ ალასანიასთან სატელეფონო საუბარი დაადასტურა, თუმცა განმარტა, რომ მასთან ტექნიკურ საკითხებს არკვევდა.