ლარის კურსის ზაფხულში დასტაბილურებასთან დაკავშირებით პრემიერ მინისტრის მიერ გაკეთებულ პროგნოზს, ეკონომიკის ექსპერტი პაატა შეშელიძე არაკომპეტენტურს უწოდებს, როგორც ექსპერტი „ნიუპოსტთან“ საუბარში აცხადებს მთავრობას ან წარმოდგენა არ აქვს ლარის დევალვაციის რეალურ მიზეზებზე, ან ამას მიზანმიმართულად მალავს:

„პირველი ვარიანტი არის ის, რომ ამ მთავრობაში არც პრემიერს და არც სხვებს არ აქვთ წარმოდგენილი ლარის დევალვაციის რეალური მიზეზები, მეორე უფრო უარესი ვარიანტი კი არის ის, რომ ისინი რეალურ მიზეზებს მალავენ. წელწადის რაღაც დროზე ორიენტაციის გადატანა, რომ მაშინ დასტაბილურდება და რაღაც შეიცვლება, ნიშნავს რომ ისინი ან არაკომპეტენტურები არიან , ან ცრუობენ. რა შეიცვლება ზაფხულში? და რატომ არ იყო ლარი წინა წლებში ზაფხულზე დამოკიდებული? ლარი პომიდორია, ვაშლი თუ მსხალი? ეს უცნაური გადატანაა. ლარი ბუნების მოვლენა არაა, ეს არის ეროვნული ბანკის ემისიის და პოლიტიკის პროდუქტი, შესაბამისად ჩვენ უნდა ვეძიოთ ამ სიტუაციიდან გამოსავალი სწორედ მონეტარულ პოლიტიკაში, პრემიერმა საგარეო ფაქტორებზე გადაიტანა აქცენტი, რა საგარეო ფაქტორი შეიცვლება ზაფხულისთვის ისეთი, რომელიც ლარის კურსს გაამყარებს? მოკლედ რომ ვთქვათ რაც არ უნდა იყოს ეს, არაკომპეტენტურობა თუ რაღაც ჩანაფიქრის საჯაროდ არგამოტანა, ნებისმიერ შემთხვევაში ამ მოვლენებით ადამიანების ძალიან დიდი ნაწილი ზარალობს“- განაცხადა პაატა შეშელიძემ.

შეშელიძის შეფასებით, პრემიერის მხრიდან კომერციული ბანკების მისამართით გაკეთებული მოწოდება - სესხების რესტრუქტურიზაციასა და გადავადებასთან დაკავშირებით, კერძო სექტორზე ზეწოლაა:

„ეს არის ზეწოლა კომერციულ ბანკებზე, ეს უნდა შეწყდეს და თავი უნდა დაანებონ კერძო სექტორისთვის ჭკუის სწავლებას. თუ ხედავენ, რომ რაღაც გასაკეთებელია, უნდა მოძებნონ რესურსი და შესაძლებლობები მთავრობაში. საკუთარი პრობლემების სხვებზე გადაბრალებით გამოსწორება შეუძლებალია. არავინ ეკითხება არც პრემიერ მინისტრს და არც ეროვნული ბანკის პრეზიდენტს, როგორ მოიქცევა კომერციული ბანკი იმ ვალდებულებების აღსრულებისას, რომელიც მათ აქვთ.“- აღნიშნავს ექსპერტი.

_{ნინო ზედგენიძე}