პრეზიდენტის თქმით, პარლამენტმა 31 მარტს უნდა დაპატიჟოს როგორც აღმასრულებელი ისე საკანონმდებლო ხელისუფლების წარმომადგენლები და მათ უნდა გადაწყვირონ სცემენ თუ არა პატივს ინსტიტუტებს.

ამის შესახებ გიორგი მარგველაშვილმა ჟურნალისტებთან საუბრისას განაცხადა.

მისი თქმით, პარლამენტში გამოსვლის დროს ყველა ფორმატისთვის მზად არის.

„მიმაჩნია, რომ პარლამენტს პატივი უნდა ვცეთ, როგორც ინსტიტუტს და თუნდაც იმ ცოტა ხნიან ტრადიციებს, რაც ჩამოყალიბდა ქართულ პოლიტიკურ რეალობაში. ჩვენ გვაქვს ტრადიცია პრეზიდენტის მოხსენებაზე დასწრების. ვფიქრობ, რომ ეს ტრადიცია არ უნდა გადავფაროთ. მიმაჩნია, რომ პარლამენტმა უნდა დაპატიჟოს, როგორც აღმასრულებელი ისე საკანონმდებლო ხელისუფლების წარმომადგენლები. მათი გადასაწყვეტია, სცემენ თუ არა ისინი ინსტიტუტებს პატივს და იმ სახელმწიფო ტრადიციებს, რომელიც საქართველოში არსებობს“, - განაცხადა გიორგი მარგველაშვილმა.