ღარიბაშვილმა არ იცის რა არის ვაჟკაცობა- ირაკლი ალასანია

პოლიტიკა - 13:49, 26 Mar, 2015

1793

"თავისუფალი დემოკრატების" ლიდერი ირაკლი ალასანია, პრემიერ-მინისტრის განცხადებას გამოეხმაურა და განაცხადა რომ ირაკლი ღარიბაშვილს ვაჟკაცობა უდანაშაულო ადამიანის დატყვევება და პროკურატურის პოლიტიკური ზეწოლისთვის გამოყენება გონია.
''პრემიერ მინისტრმა, ღარიბაშვილმა არ იცის რა არის ვაჟკაცობა და არ იცის რა არის სპეკულაცია, მისთვის სპეკულაცია არის სიმართლის თქმა და ვაჟკაცობა გონია, როდესაც უდანაშაულო ადამიანს ატყვევებ და პროკურატურას იყენებ პოლიტიკური ზეწოლისთვის. მას უცხო სიტყვათა ლექსიკონიდან კიდევ ერთ განმარტებას მივცემ და ვეტყვი, რომ თავდაცვით შეიარაღების გადმოცემაზე ხელის შეშლა, სახელმწიფო მავნებლობაა და რათქმაუნდა ეს საკითხი სახელმწიფო მნიშვნელობისაა. მე ამ თემის ტექნიკურ დეტალებზე არ ვისაუბრე, მაგრამ გადაწყვეტილების მიღების ხელის შეშლა რომ იყო, ეს ფაქტია და ბუნებრივია მას მომავალში პასუხი მოეთხოვება''.- განაცხადა ირაკლი ალასანიამ.

შეგახსენებთ, ირაკლი ალასანიას მიერ გაკეთებულ განცხადებას იმასთან დაკავშირებით, რომ საფრანგეთში ვიზიტისას მინდია ჯანელიძემ დაურეკა და უთხრა, არ მოეწერა ხელი საჰაერო თავდაცვის შესახებ მემორანდუმისათვის, საქართველოს პრემიერი დღეს გამართულ პრესკონფერენციაზე გამოეხმაურა:

„მე არ ვაპირებდი ალასანიას განცხადების კომენტირებას, ბატონმა მინდიამ გასცა უკვე პასუხი, მიმაჩნია რომ მსგავსი საკითხის პოლიტიზება და ამ თემებით სპეკულირება უზნეო საქმეა. სახელმწიფოებრივად მნიშვნელოვანი და საიდუმლო საქმეებით სპეკულირება ვაჟკაცების საქმე არაა .“- განაცხადა ირაკლი ღარიბაშვილმა.