სავალუტო შემოდინებები ამ სიტუაციაში ერთადერთი წამალი და რეცეპტია- გიორგი ქადაგიძე

პოლიტიკა - 14:23, 25 Mar, 2015

1139

ეროვნული ბანკის პრეზიდენტი გიორგი ქადაგიძე ქვეყანაში შექმნილი ეკონომიკური სიტუაციის ერთადერთ „წამლად“ ქვეყანაში სავალუტო შემოდინებების აღდგენას მიიჩნევს

ამასთან დაკავშირებით ქადაგიძემ სასტუმრო „ქორთიარდ მარიოტში“ საქართველოს ბიზნესასოციაციის წევრი კომპანიების წარმომადგენლებთან შეხვედრის დროს განაცხადა.

როგორც ქადაგიძემ აღნიშნა, ძალიან მნიშვნელოვანია, რომ ის ფუნდამეტური ფაქტორები, რომლებმაც ლარის გაცვლით კურსზე გავლენა მოახდინა, აღმოიფხვრას.

„უფრო მარტივ ენაზე რომ ვთქვათ, საჭირო და აუცილებელია, რომ აღდგეს სავალუტო შემოდინებები, რაც ამ სიტუაციაში ერთადერთი „წამალი“ და რეცეპტია. ეროვნული ბანკის მხრიდან განხორციელებული ქმედებები მიმართულია იმისკენ, რომ იმ პროცესების გავლენა შევარბილოთ, რაც ბოლო თვეების განმავლობაში განვითარდა“, -აღნიშნა ქადაგიძემ.

მისივე მტკიცებით, ეროვნული ბანკის მანდატი ფასებისა და ფინანსების სტაბილურობაა. ორივე ეს მანდატი კი, როგორც აქამდე, ისე მომავალში, ქადაგიძის განმარტებით, საერთაშორისო სტანდარტების შესაბამისად შესრულებული იქნება.

რაც შეეხება მიზნობრივი ინფლაციის მაჩვენებელს, ქადაგიძემ განმარტა, რომ ეს მთავარი ორიენტირია, რომლის ირგვლივაც, პრაქტიკულად, ეროვნულმა ბანკი თავისი მონეტარული პოლიტიკის მიზნების განსაზღვრისას მოქმედებს.

მისი თქმით, ეროვნული ბანკის პოლიტიკა სწორი და თანმიმდევრულია.

ამასთან, ქადაგიძემ იმპორტის მაჩვენებელთან დაკავშირებითაც ისაუბრა და აღნიშნა, რომ იმპორტი კორექტირებას აუცილებლად გააკეთებს, რადგანაც საგადასახადო ბალანსში ახალი წერტილი და წონასწორობის ნიშნული ფიქსირდება.

„იმპორტმა ზრდა შეაჩერა და ველოდებით, რომ მომდევნო თვეებში ახალ ნიშნულს მივიღებთ, რომელიც ფაქტობრივად ახალი მიმართულებით ვითარდება“, -განმარტა ეროვნული ბანკის პრეზიდენტმა.