დასავლური არჩევანი არის ხალხის რეაქცია ხელისუფლების წარმომადგენელთა მესიჯზე

დასავლური არჩევანი არის ხალხის რეაქცია ხელისუფლების წარმომადგენელთა მესიჯზე - ფანჯიკიძე

პოლიტიკა - 14:08, 25 Mar, 2015

1448

„თავისუფალი დემოკრატების“ საგარეო ურთიერთობის მდივნის, მაია ფანჯიკიძის განცხადებით, IRI-ს კვლევებმა აჩვენა, რომ „თავისუფალი დემოკრატები“ სერიოზული ძალაა და მისი რეიტინგი მომავალში კიდევ უფრო გაიზრდება. ამასთანავე ფანჯიკიძის თქმით ნათლად გამოჩნდა, რომ მოსახლეობა მთავრობის მუშაობა არ მოწონს.

IRI-ს კვლევის შედეგები ფანჯიკიძემ "ნიუპოსტთან" შეაფასა.

„ამ კვლევის შედეგად გამოიკვეთა, ის რომ მოსახლეობა მთავრობის მუშაობით უკმაყოფილოა. საქართველოს მოქალაქეებს ადარდებს უმუშევრობა, ეკონომიკური და ფინანსური ვითარების გაუარესება. გამოჩნდა ის, რომ საგრძნობლად არის დაკლებული ნდობა სახელმწიფო ინსტიტუტების მიმართ. კვლევის შედეგებმა აჩვენა, რომ ხელისუფლებას ხალხთან მეტი კონტაქტი სჭირდება.“- აღნიშნა ფანჯიკიძემ.

საგარეო საქმეთა ყოფილი მინისტრის თქმით, ამ კვლევებმა კიდევ ერთხელ ხაზი გაუსვა საქართველოს მოსახლეობის პრიორიტეტებს საგარეო კურსთან დაკავშირებით:

„კვლევის შედეგების მიხედვით ცხადი გახდა, რომ ევროპული და ევროატლანტიკური ინტეგრაცია ამ ქვეყნის მოსახლეობისთვის ისევ პრიორიტეტია. ალბათ ეს არის რეაქცია იმაზე, რომ ამ პრიორიტეტის საწინააღმდეგო მესიჯები გაჟღერდა ხელისუფლების ზოგიერთი წარმომადგენლების მხრიდან.“- აცხადებს საგარეო უწყების ყოფილი ხელმძღვანელი.

მაია ფანჯიკიძის შეფასებით გამოკითხვის შედეგებმა აჩვენა, თუ რამდენად ანგარიშგასაწევი ძალაა „თავისუფალი დემოკრატები“ და მისი ლიდერი. ფანჯიკიძის პროგნოზით პარტიის რეიტინგის მაჩვენებელი მომავალში კიდევ უფრო გაიზრდება

„გამოიკვეთა ის რომ „თავისუფალი დემოკრატები“ არის სერიოზული ძალა და მას აქვს ზრდის პოტენციალი. მისი ლიდერი არის ძალიან პოპულარულია და ეს არის კარგი წინაპირობა იმისთვის, რომ მომავალში „თავისუფალი დემოკრატების“ მაჩვენებელი კიდევ უფრო გაიზარდოს.“- აღნიშნა მაია ფანჯიკიძემ.

_{ნინო ზედგენიძე}