ფინანსთა მინისტრის ნოდარ ხადურის თქმით, კარგი იქნება "საერთაშორისო გამჭვირვალობა საქართველოს" მიერ გამოქვეყნებული კვლევის ავტორმა ელემენტარული არითმეტიკა იცოდეს.

ამის შესახებ მინისტრმა დეფიციტის მაჩვენებლის ცვლასთან დაკავშირებით ორგანიზაციის მიერ გავრცელებული განცხადების საპასუხოდ განაცხადა.

"ჯერ ერთი, რომ მთლიანი შიდა პროდუქტის მაჩვენებელი გუშინწინ თუ გუშინ დაზუსტდა. ასევე 80 მილიონი საგადასახადო შემოსავალი, რომელიც ბიუჯეტში არ იქნა მიმართული, მიიმართა დაბრუნების ქვეანგარიშზე კანონის შესაბამისად. ამის მიუხედავად ბიუჯეტი გადაჭარბებით შესრულდა. ვფიქრობ, ცოტა მეტი პროფესიონალიზმი, რომ გამოიჩინონ ადამიანებმა და მერე გააკეთონ განცხადებები, ცუდი არ იქნება. მინდა შევთავაზო ყველა ორგანიზაციას, ვისაც სურვილი ექნება, ფინანსთა სამინისტროს აკადემიაში კვალიფიკაციის ამაღლების კურსები გაიაროს“, - განაცხადა ხადურმა.

არასამთავრობო ორგანიზაცია „საერთაშორსო გამჭვირვალობა საქართველო“ ფინანსთა სამინისტროს საკუთარ ვებგვერდზე დეფიციტის შესახებ განთავსებული ინფორმაციის შესწორებისკენ მოუწოდებს. არასამთავრობო ორგანიზაციის წევრები აცხადებენ, რომ ფინანსთა სამინისტრომ 4 სხვადასხვა მონაცემი გამოაქვეყნა, ამჟამად კი ვებ გვერდზე ერთდროულად ორი მონაცემია განთავებული.

არასამთავრობო ორგანიზაციაში აქცენტს ფინანსთა სამინისტროს მიერ დეფიციტის დათვლის ორ მეთოდოლოგიაზე აკეთებენ და მას აბსურდულს უწოდებენ.