პრემიერის თქმით, საქართველოს ევროპული გზა შეუქცევადია, ხოლო ქვეყნის სამოქმედო გეგმა ევროპულ ღირებულებებთან მიახლოებაა.

ამის შესახებ ირაკლი ღარიბაშვილმა დონორების ყოველწლიურ საკოორდინაციო ფორუმზე სიტყვით გამოსვლისას განაცხადა.

„საქართველოს ევროპული გზა შეუქცევადია, ხოლო ჩვენი სამოქმედო გეგმა ევროპულ ღირებულებებთან მიახლოებაა. ამ ყველაფერს საფუძვლად უდევს ადამიანის უფლებების დაცვა და ფუნდამენტური თავისუფლება. ასოცირების ხელშეკრულების დღის წესრიგი ჩვენს ქვეყანას მნიშვნელოვანი განვითარების პრიორიტეტებს უსახავს. ეს კი გულისხმობს რეფორმების უპრეცედენტო პროგრამას, რომელმაც უნდა განსაზღვროს ჩვენი საქმიანობა მომდევნო წლების განმავლობაში. რაც შეეხება საქართველოს გეგმებსა და დონორულ პროგრამებს შორის შესაბამისობას, მისასალმებელია, რომ დღეს დონორთა საზოგადოება აქტიურად მსჯელობს დახმარების ერთობლივი პროგრამირების შესახებ“, - განაცხადა ღარიბაშვილმა.