თბილისის მერი დავით ნარმანია მერიის ზედამხედველობის საქალაქო სამსახურის უფროსის გეგი ნიჟარაძის თანამდებობიდან გადაყენებას არ აპირებს.

ნარმანია ნიჟარაძის მუშაობით კმაყოფილია.

„თუ ვინმემ კანონმდებლობა დაარღვია არსებობენ სამართალდამცავი ორგანოები, რომლებიც პრობლემაზე რეაგირებას ახორციელებენ. მათი მხრიდან რაიმე მოთხოვნა იმაზე, რომ ნიჟარაზეს უფლებამოსილება უნდა შეუჩერდეს, არ ყოფილა. ის მასზე დაკისრებულ მოვალეობას კარგად ასრულებს და ვფიქრობ, რომ არ უნდა შეუჩერდეს უფლებამოსილება და უნდა გააგრძელოს საქმიანობა, მითუმეტეს გუშინ მე მას ძალიან ბევრი დავალება მივეცი“, - აცხადებს ნარმანია.

„სამოქალაქო მონიტორინგის ცენტრის“ ინფორმაციით, გეგი ნიჟარაძის შესახებ ინფორმაცია მთავარ პროკურატურაშია გადაგზავნილი. მათი ინფორმაციით, საგამოძიებო უწყებაში ინფორმაცია მერიიდან შევიდა და საუბარია ზედამხედველობის სამსახურის ყოფილი თანამშრომლის ბრალდებაზე. ორგანიზაცია ნარმანიას გეგი ნიჟარაძისთვის უფლებამოსილების შეწყვეტას მოუწიდებს.

ნინი კაციტაძე