ჯონ ქერიმ მადლობა გადაუხადა მის წინამორბედს ჰილარი კლინტონს ამერიკის სახელმწიფო ინტერესებისა და ქვეყნის ღირებულებების დაცვისათვის.

,,მინდა მადლობა გადავუხადო ჩემს წინამორბედს ჰილარი კლინტონს, მთელ გუნდს, ისინი დაუღალავად იცავდნენ ჩვენი ქვეყნის ღირებულებებს და იმას, რაც მიმართული იყო ჩვენი ქვეყნის ინტერესების წინა პლანზე დაყენებისთვის. მე ვიცი როგორი შემართებით აკეთებდა ყველაფერს და მადლიერი იყო იმ საქმისთვის, რომელსაც ყოველი თქვენთაგანი აკეთებდა. მინდა ერთად ვუთხრათ მას - სამუშაო კარგად შესრულებულია და ამისთვის მადლიერია ქვეყანაც და მთელი მსოფლიოც’’, - განაცხადა ჯონ ქერიმ.

ჯონ ქერი სახელმწიფო მდივნის რანგში ოფიციალურად სამუშაოს დღეს შეუდგა, თუმცა შაბათ-კვირას მას უკვე ჰქონდა რამდენიმე სატელეფონო ზარი, მათ შორის ისრაელის, პალესტინის, თურქეთის,  კანადის, მექსიკის, სამხრეთ კორეის და იაპონიის ლიდერებთან.

მაჰმუდ აბასთან და ბენიამინ ნეთანიაჰუსთან ჯონ ქერიმ განიხილა ახლო აღოსავლეთის საკითხი და როგორც ცნობილი გახდა, ამერიკის სახელმწიფო მდივანი ამ რეგიონს მალე მოინახულებს. თურქეთს ლიდერთან საუბრის დროს კი განიხილებოდა ანკარაში ამერიკის საელჩოსთან მომხდარი აფეთქება. კორეის და იაპონიის ლიდერებთან კი, ჯონ ქერიმ, ჩრდილოეთ კორეის კრიზისი განიხილა.

ჯონ ქერი იყო ყველაზე მდიდარი სენატორი და თუ არ ჩავთვლით მისი მეუღლის კაპიტალს, მისი ქონება 180 მილიონ დოლარს შეადგენს.