უზენაესი სასამართლოს ახალი თავმჯდომარის ნინო გვენეტაძის თქმით, ქვეყანას აქვს რეალური შანსი, რომ მიიღოს დამოუკიდებელი და მიუკერძოებელი მართლმსაჯულება.

ამის შესახებ გვენეტაძემ თანამშრომლებთან მისი წარდგენისას განაცხადა.

მისი თქმით, საქართველოს თითოეული მოქალაქე თავს დამოუკიდებლად უნდა გრძნობდეს, და ხელისუფლების განცხადებებმა მოსამართლის გადაწყვეტილებაზე გავლენა არ მოახდინოს.

„სასამართლო დამოუკიდებლობა და საზოგადოებრივი ნდობის ამაღლება არის ის უმთავრესი მიზანი, რომლისთვისაც თქვენ იღწვოდით და ერთიანი ძალისხმევით მოგვიწევს ამაზე ფიქრი. ქვეყანას აქვს რეალური შანსი, რომ მიიღოს მართლაც დამოუკიდებელი და მიუკერძოებელი მართლმსაჯულება და ჩვენ ეს შანსი უნდა გამოვიყენოთ. უზენაესი სასამართლოს კედლები ჩემთვის უცხო არ არის. მე გავიარე სამოსამართლეო უფლებამოსილების პერიოდი, ასევე განვლე ბრძოლის გზა, რომელმაც თქვენთან დამაბრუნა. შევეცდები საზოგადოების მოლოდინი სიმართლის დასადგენად და სამართლიანობის დასამკვიდრებლად, თქვენთან ერთად გავამართლო", - განაცხადა ნინო გვენეტაძემ.

მან სასამართლო სისტემაში განსახორციელებელ ცვლილებაზეც ისაუბრა და აღნიშნა, რომ დამოუკიდებელი სასამართლოს ფუნქციონირებისთვის ცვლილებები აუცილებელი იქნება.

"ბუნებრივია, კანონის ფარგლებში განხორციელდება ისეთი ცვლილებები, რომლებიც დამოუკიდებელ და მიუკერძოებელ სასამართლოს დასჭირდება. რაც შეეხება ცვლილებას, ამას შემდგომში გაცნობებთ“, - განაცხადა გვენეტაძემ.

უზენაესი სასამართლოს ახალი თავმჯდომარე, ცოტა ხნის წინ, საქართველოს პრეზიდენტმა ოფიციალურად წარადგინა.

ნინი კაციტაძე