უზენაესი სასამართლოს ყოფილმა თავმჯდომარემ ჟურნალისტებს სამომავლო გეგმები გაანდო.

როგორც კუბლაშვილმა განაცხადა, ის ქვეყნის დატოვებას არ აპირებს. რაც შეეხება თუ სად და რა დარგში განაგრძობს უზენაესი სასამართლოს ყოფილი თავჯდომარე მოღვაწეობას, ამაზე კუბლაშვილმა აღნიშნა, რომ მას ევროპის საბჭოდან შეთავაზება აქვს მიღებული.

"მე საქართველოში ვარ - უნივერსიტეტში და ასევე ევროპის საბჭოდან გარკვეული შემოთავაზება მაქვს, ვნახოთ", - განაცხადა კუბლაშვილმა უზენაესი სასამართლოს ახალი თავჯდომარის წარდგენის დასრულების შემდეგ.

უზენაესი სასამართლოს ყოფილ თავმჯდომარეს კოტე კუბლაშვილს საქართველოს პრეზიდენტმა გიორგი მარგველაშვილმა მადლობა გადაუხადა.

ქვეყნის პირველმა პირმა უზენაესი სასამართლოს ახალი თავმჯდომარის წარდგენაზე ინსტიტუტების მდგრადობისა და მემკვიდრეობითობის მნიშვნელობაზე ისაუბრა.

"დღეს ჩვენ კიდევ ერთ სერიოზულ საკითხს – ინსტიტუტების მდგრადობას და მემკვიდრეობითობას ვუსვამთ ხაზს. ბატონი კოტეც დღეს ჩვენთან ერთად არის და ამით ნათლად ვაჩვენებთ, რომ ჩვენ პატივს ვცემთ ინსტიტუტებს, ვაგრძელებთ ინსტიტუციურ მემკვიდრეობას და საქართველოში ის, რაც მოხდა 2012 წლის 1-ელ ოქტომბერს, როდესაც მოხდა მშვიდობიანი ცვლა პოლიტიკური ხელმძღვანელობის, ეს არ იწვევს რყევებს.

ჩვენ შეიძლება გვქონდეს სხვადასხვა შეხედულებები, მაგრამ მთავარია ჩვენი სახელმწიფო, აქედან გამომდინარე, ვაძლიერებთ მის ინსტიტუტებს. ინსტიტუტების გაძლიერება ყველა ჩვენგანისთვის მნიშვნელოვანია. მე მინდა, მადლობა ვუთხრა ბატონ კოტეს მობრძანებისთვის; მადლობა ვუთხრა იმისთვის, რომ დღეს ჩვენ გვაქვს თაობათა ცვლა, ერთი თავმჯდომარე მიდის, მეორე მოდის, მაგრამ ინსტიტუტი რჩება და ეს არის უმნიშვნელოვანესი", - განაცხადა გიორგი მარგველაშვილმა.