ეროსი კიწმარიშვილის ძმა ზურაბ კიწმარიშვილი ბიძინა ივანიშვილის განცხადებას არაობიექტურს უწოდებს, სადაც ექსპრემიერმა ეროსი კიწმარიშვილი არაობიექტურობაში დაადანაშაულა.

როგორც „ნიუპოსტთან“ საუბარში ზურა კიწმარიშვილმა განაცხადა, მისი ძმა ტელეკომპანიის სარედაქციო პოლიტიკაში არ ერეოდა.

„მე ამ მოსაზრებაში ბატონ ბიძინა არ ვეთანხმები. ყველას გახსოვთ, როდესაც იყო საუბრები „მაესტროს“ მუშაობასთან დაკავშირებით, იქ ყველა აღნიშნავდა, რომ კონკრეტულად ეროსი კიწმარიშვილი, რომელიც იმ დროს მართავდა „მაესტროს“, რედაქციის მუშაობაში არ ერეოდა. ის შეფასება, რომ „მაესტრო“ მართული იყო და მას ეროსი კიწმარიშვილი მართავდა, არაობიექტურია.

რაც შეეხება მის განცხადებას, რომ „ჩემი მოსვლის შემდეგ ის გავიდა „მაესტროდან“, საინტერესოა რას გულისხმობს ივანიშვილი? სად მოსვლის შემდეგ? ბატონი ბიძინა ჯერ ხელისუფლებაში არ იყო მოსული, როდესაც ეროსი კიწმარიშვილი გავიდა „მაესტროსთან“. როგორ მოხდა ეროსის გასვლა ტელეკომპანიიდან, ეს საკითხი ჯერ კიდევ არ არის შეფასებული სათანადოდ. სამწუხაროა, რომ მთავარი მოქმედი პირი ცოცხალი აღარ არის, მაგრამ მე ვფიქრობ საზოგადოებას ამ საკითხზე სწორი ინფორმაცია აქვს. მათ იციან, რომ ეროსი კიწმარიშვილი არაკორექტულად იქნა „მაესტროდან“ „გასული“. როდესაც ბატონი ბიძინა პოლიტიკურ ასპარეზზე შემოვიდა, იმ მომენტში თუ მას „მაესტროს“ მიმართ პრეტენზია ჰქონდა, ეს პრეტენზია ვერ იქნებოდა ეროსი კიწმარიშვილის მიმართ, რადგან ეროსი მაშინ აწარმოებდა არხის მენეჯმენტს და არა - სარედაქციო პოლიტიკას. ახლანდელი გადასახედიდან, კიწმარიშვილსის მოხსენიება, როგორც „მაესტროს“ არაობიექტურობის შემქნელისა, არასწორია, ეროსი „მაესტროში“ იყო მენეჯერის ფუნქციებით. მან ყველაფერი გააკეთა, რომ კარგად ყურებადი ყოფილიყო“, - განაცხადა კიწმარიშვილმა.

რამდენიმე დღის წინ ექსპრემიერმა ბიძინა ივანიშვილმა განაცხადა, რომ ტელეკომპანია „მაესტრო“ მართული იყო.

„ ეროსი კიწმარიშვილი ჩემი მოსვლის შემდეგ ძლივს გავიდა „მაესტროდან“ და სადაც ეროსი კიწმარიშვილი იყო, იქ როგორ შეიძლება ილაპარაკო ობიეტურობაზე“, - აღნიშნა ივანიშვილმა.

ნინო დათაშვილი