„თავისუფალი დემოკრატები“ მთავრობის იმპიჩმენტთან დაკავშირებით „ნაციონალური მოძრაობის“ განცხადებას პასუხობენ.

როგორც პარტიის მიერ გავრცელებულ ინფორმაციაშია ნათქვამი, მთავრობა უნდა შეიცვალოს და ამის თაობაზე გადაწყვეტილება თავად მმართველმა ძალამ უნდა მიიღოს.

„ჯერ კიდევ აჭარაში განვითარებულმა მოვლენებმა ნათლად აჩვენა, რომ თავისუფალი დემოკრატების სიტყვას აქვს ერთ-ერთი გადამწყვეტი მნიშვნელობა ქვეყანაში არსებული პოლიტიკური პროცესების განვითარების თვალსაზრისით. ჩვენი პოლიტიკური ძალა არის ორიენტირებული პრობლემების მოგვარებაზე, პროგრესსა და სტაბილურობაზე. სამწუხაროდ, დღევანდელ ხელისუფლებას არ შესწევს ამ ყველაფრის უზრუნველყოფის უნარი. ამიტომაც ჩვენ, ,,თავისუფალმა დემოკრატებმა" პირველებმა დავაყენეთ მთავრობის პასუხისმგებლობის საკითხი, მაგრამ ეს სრულებითაც არ ნიშნავს, რომ დაუფიქრებლად შევუერთდებით ნებისმიერ პროცესს თუ პროცედურას. მთავრობა უნდა შეიცვალოს და ამის თაობაზე გადაწყვეტილება თავად მმართველმა ძალამ უნდა მიიღოს, უმოკლეს დროში“, - ნათქვამია განცხადებაში.

შეგახსენებთ, მიხეილ მაჭავარიამა განაცხადა, რომ მთავრობის იმპიჩმენტის პროცედურის დაწყებაში „თავისუფალი დემოკრატების“ იმედი აქვთ.