რატომ არკვევდა შსს ,,რეაქციის“ პროდიუსერებსა და ,,ქართული ოცნების“ წევრებს შორის საუბრებს

პოლიტიკა - 23:47, 20 Mar, 2015

2099

გადაცემა "რეაქციის" წამყვანის ინგა გრიგოლიას განცხადებაზე, რომ უმრავლესობის წევრებმა 21 მარტის თემის გაშუქების გამო მის გადაცემაში მონაწილეობაზე უარი თქვეს, შს მინისტრის მოადგილე ლევან იზორია გამოეხმაურა

"თქვენ ბრძანეთ, რომ გარკვეულ მითითებას ჰქონდა ადგილი, მე დავაზუსტე და არავითარ მითითება არ ყოფილა. მათ უფლება ჰქონდათ უარი ეთქვათ. ეს არც გადაცემის ბოიკოტია და არც პიროვნულია. მათ უბრალოდ ჩათვალეს, რომ აქციაზე მიდის თუ არა მოქალაქე ეს არ არის აქტუალური"- განაცხადა იზორიამ.

ინგა გრიგოლია დაინტერესდა იმ საკითხით, თუ რატომ ცდილობდა შს სამინისტროს მაღალჩინოსანი მისი გადაცემის საკითხების გარკვევას:

"რას ნიშნავს ჩემს გადაცემაზე კომენტარი შინაგან საქმეთა მინისტრის მოადგილის მხრიდან? რას ნიშნავს გაარკვიეთ და როგორ გაარკვიეთ? რა ფორმით გაარკვია შინაგან საქმეთა მინისტრის მოადგილემ, რა მოლაპარაკებები იყო გადაცემის პროდიუსერებსა და უმრავლესობის წევრებს შორის"- მიმართა კითხვით გრიგოლიამ ლევან იზორიას.

"როდესაც თქვენ მითხარით ამ კითხვას დავსვამო, მე დავინტერესდი . ჩემი მოვალეობაში თქვენი უფლებების დაცვაც შედის, როდესაც თქვენ განცხადებას გააკეთებთ, რომ ვიღაცა ზეწოლას ახდენს და მითითებას აკეთებს თქვენ ჟურნალისტურ საქმიანობაზე, მე ვალდებული ვარ, რომ ამ უკანონო ქმედების მიმართ მქონდეს ჩემი პროტესტი და პრეტენზია. მე დავინტერესდი, ადგილი ჰქონდა თუ არა რაიმე სახის ზეწოლას, ეს ჩემი ლეგიტიმური უფლება. ჩვენ იმისთვის მოგვიყვანა ხელისუფლებაში ხალხმა, რომ თქვენც დაგიცვათ."- აღნიშნა იზორიამ.

გრიგოლია: "მე თავს როგორმე დავიცავ ნებისმიერი ზეწოლისგან, მე არ ვისურვებდი, რომ ჩემი გადაცემის შესახებ ინფორმაციები აზუსტოს შსს -მ. მე მაქვს ძალიან ცუდი პრაქტიკა, როგორც ჟურნალისტს შსს-სთან ურთიერთობის, რადგან ძალიან ცუდი რაღაც ხდებოდა ჩემზე. არ მინდა რომ შსს-ში მივიდე და გამოძიება დაიწყონ ან შსს-მ არკვიოს მე ვიყავი მტყუანი თუ მართალი, როდესაც ვამბობდი, რომ მოლაპარაკება მქონდა საპარლამენტო უმრავლესობასთან"

იზორიას თქმით, არ ხდებოდა საუბრის დეტალების გარკვევა, არამედ ხდებოდა იმის გარკვევა ქონდა თუ არა ზეწოლას ადგილი ჟურნალისტის საქმიანობაზე. ლევან იზორიამ არ დააკონკრეტა პირი, რომელმაც მას მიაწოდა ინფორმაცია, რომ ზეწოლა არ ყოფილა.

"ეს სტერეოტიპი, რომ შსს მხოლოდ პოლიციურ ფუნქციებთან არის გაიგივებული და ძალოვანი სისტემის სახელი აქვს დამკვიდრებული არის ძველი, თუ ჩვენ გვინდა ევროპული ტიპის შსს, ეს არის საშინაო ტიპის საკითხები, მათ შორის თემები რომელიც ეხება ჟურნალისტებს, ჟურნალისტის მხრიდან წამოსულ პრეტენზიებს."- განაცხადა იზორიამ.

_{ნინო ზედგენიძე}