„ერთიანი ნაციონალური მოძრაობის“ ერთ-ერთი ლიდერის დავით ბაქრაძის განცხადებით, 21 მარტის აქციის აუცილებლობა მთავრობის პოლიტიკის გამო დადგა, რადგან საქართველოს ხელისუფლებამ ქვეყანა განვითარება შეაჩერა და ქვეყანა ყველა სფეროში უკან მიდის. ბაქრაძის თქმით ქვეყნის ეკონომიკას უფსკრულის პირასაა და თუ ჩარევა დროულად არ მოხდა, ის უფსკრულში აღმოჩნდება საიდანაც ქვეყნის ამოყვანას წლები დასჭირდება.

„ხვალინდელი აქციით ჩვენ ვიწყებთ ახალ ეტაპს როგორც პოლიტიკური პარტია და ეს ახალი ეტაპი დასრულდება მთავრობის შეცვლით, რომელმაც ვერანაირი უკეთესობა ვერ მოუტანა ქვეყანას.

მე ყოველთვის ვამბობდი , რომ მე არ მომწონს ეს მთავრობა, მაგრამ პატივს ვცემ ხალხის არჩევანს , ხალხშიც იყო განწყობა რომ ვაცალოთ ამ მთავრობას. ვაცადეთ და ერთადერთი რაც მოახერხა ამ მთავრობამ არის ის რომ ყველა ოჯახში შეიტანა გაუარესება. ახლა დაცდის დრო და დაცდის რესურსი აღარ არსებობს, ამ მთავრობამ აჩვენა, რომ მას ქვეყნის წინ წაყვანა და განვითარება არ შეუძლია.

მე მინდა ვუთხრა მოსახლეობას , ხვალ ნამდვილად არაფერი არ სრულდება, პირიქით ხვალ იწყება ეტაპი , რომელიც დასრულდება იმ მთავრობის გადადგომით რომელსაც ქვეყანას უკანსვლის და სიდუხჭირის მეტი ვერაფერი მოუტანა“- განაცხადა დავით ბაქრაძემ.

დავით ბაქრაძის განცხადებით, იმ პირებს ვისაც ხვალინდელ აქციაში მონაწილეობის მიღება სურთ ხელისუფლება ხელოვნურ ბარიერებს უქმნის, ხდება მძღოლების დაშინება და რეგიონში ნაციონალური მოძრაობის წარმომადგენლებზე ზეწოლა.

ბაქრაძის თქმით მიუხედავად იმისა რომ 15 ნოემბრის აქციას წინ უძღვოდა შავი პიარი, თითქოს ნაციონალები მაიდანის მოწყობას აპირებდნენ, ოპოზიციამ ამ აქციის ჩატარება ღირსეულად შეძლო, როგორც ბაქრაძე აცხადებს მსგავსი ღირსეული აქციის ჩატარება იგეგმება 21 მარტსაც.

„როდესაც საუბრობენ, რომ ეს ყველაფერი კეთდება ნაციონალების ხელისუფლებაში დასაბრუნებლად , ეს ასე არ არის. ნებისმიერი დაბრუნება და ნებისმიერი თანამდებობა ჩემთვის იქნება მისაღები მაშინ, როდესაც ეს იქნება ქართველი ხალხის ნება და არჩევნების შედეგი. ის რომ ჩვენ მთავრობის გადადგომას ვითხოვთ ეს არ კეთდება იმისთვის, რომ ვიღაცა მოვიდეს და მათი სკამი დაიკავოს. ეს არ არის სკამისთვის ბრძოლა. ჩვენ მთავრობის გადადგომას ვითხოვთ იმიტომ, რომ ყოველი დღე არის უარესობისკენ წასვლის და თუ ეს არ შეჩერდა უახლოეს თვეებში შესაძლოა ქვეყნის ეკონომიკა ისეთ უფსკრულში ჩავარდეს, რომ იქიდან ამოსვლას წლებიც არ ეყოფა. ეს არ არის ნაციონალების მოსაბრუნებელი აქცია ეს არის ამ ქვეყნის განვითარების გასაგრძელებელი აქცია.“- განაცხადა ბაქრაძემ.

_{ნინო ზედგენიძე}