„ნაციონალური მოძრაობის“ წევრმა გოკა გაბაშვილმა პარტიის ოფისში გამართულ ბრიფინგზე ხვალინდელი აქციის შესახებ კიდევ ერთხელ ისაუბრა. გაბაშვილმა საქართველოს მთავრობას და შსს-ს თანამშრომლობის მიუხედავად მოუწოდა, რომ უწყების სპეციალური უსაფრთხოების სამსახურის (სუს-ის) დახმარებით, აქციაზე რეგიონებიდან ჩამომსვლელებს ხელი არ შეუშალონ.

საპარლამენტო უმცირესობის დეპუტატის განცხადებით, პარტიის წევრებს აქვთ ინფორმაცია, რომ მოსალოდნელია პროვოკაციული ქმედებები და დასავლეთ საქართველოდან აქციაზე ჩამოსვლის მსურველებს შესაძლოა სუსის თანამშრომელთა გარკვეულმა ჯგუფებმა ხელი შეეშალოთ.

„ჩვენ, ერთი მხრივ, მივესალმეთ საპატრულო პოლიციის სურვილს, რომ აქციის საორგანიზაციო საკითხებზე გაგვემართა შეხვედრა, რომელიც გაიმართა კიდეც, მაგრამ მეორე მხრივ, გვინდა მოვუწოდოთ საქართველოს მთავრობას, მეორე ხელით, თავისი პოლიციის სხვა დანაყოფის - სუს-ის ხელით, ნუ შეეცდებიან მცირე პროვოკაციებით ხელი შეუშალონ აქციაზე მოსვლის მსურველ ადამაინებს.

ხვალ ყველა ჩვენი მხარდამჭერი მოემართება აბსოლუტურად მშვიდობიანი განზრახვებით, მაგრამ ძალიან მტკიცედ, მყარად საქართველოს მთავრობის გადადგომის მოთხოვნით და ნუ შეეცდებიან, განსაკუთრებით დასავლეთ საქართველოში, რისი ინფორმაციებიც ჩვენ გვაქვს, აჭარაში თუ სამეგრელოში, მცირე პროვოკაციებით აქციისთვის ხელის შეშლას“,- აცხადებს უმცირესობის დეპუტატი.

გაბაშვილის განცხადებით, აქციის საწინააღმდეგო ქმედებები უშედეგო იქნება, რადგან მთავრობის წინააღმდეგ განწყობილი საზოგადოება პროტესტის გამოსახატად შესაბამის ფორმებს მაინც მოძებნიან.

თავისუფლების მოედანზე „ნაციონალური მოძრაობის“ მიერ მთავრობის გადადგომის მოთხოვნით, აქცია ხვალ 16:00 საათზეა დაგეგმილი.