ქადაგიძე ივანიშვილის კრიტიკას კიდევ ერთხელ პასუხობს

პოლიტიკა - 17:57, 20 Mar, 2015

1702

ყოფილი პრემიერ მინისტრის მიერ ეროვნული ბანკის ქმედებებთან დაკავშირებით გაკეთებულ განცხადებებს, ეროვნული ბანკის პრეზიდენტი გიორგი ქადაგიძე გამოეხმაურა. ქადაგიძის თქმით, სებ-ი ყველაფერს აკეთებს იმისთვის, რომ ეკონომიკაში არსებული პრობლემები შეარბილოს. საკითხის ფუნდამენტურად მოსაგვარებლად კი ქადაგიძის თქმით საჭიროა ქვეყანაში ფუნდამენტური ფაქტორები გამოსწორდეს, რათა ქვეყანაში ვალუტის შემოდინების აღდგენა მოხდეს

"ეროვნული ბანკის მიერ განხორციელებული ქმედებები, იყო და არის სწორი, დროული და ადეკვატური. ეს აღიარებულია ყველა საერთაშორისო ავტორიტეტული ორგანიზაციის მიერ არაერთხელ. ჩვენ მომავალშიც გავაგრძელებთ თანმიმდევრულად იმ ნაბიჯების გადადგმას, რომელიც საჭიროა, რათა მაქსიმალურად შევარბილოთ ის პროცესები, რაც დღეს ეკონომიკაში მიმდინარეობს. კიდევ ერთხელ ვიმეორებ, ეროვნული ბანკის გადადგმული ნაბიჯები და მიღებული გადაწყვეტილებები აღიარებული და მხარდაჭერილია ყველა საერთაშორისო ორგანიზაციის მიერ არაერთხელ ბოლო პერიოდის განმავლობაში", - განაცხადა ქადაგიძემ.

ქადაგიძის თქმით, ლარის კურსთან დაკავშირებით ის დეტალურად პარლამენტის წინაშე წლიური ანგარიშით წარდგენისას ისაუბრებს:

"ვფიქრობ, ლარის კურსთან დაკავშირებით ბოლო პერიოდში ბევრი საუბარი და მსჯელობა იყო. უფრო დეტალურად ამასთან დაკავშირებით ვისაუბრებ, როდესაც პარლამენტის წინაშე წლიური ანგარიშით წარვსდგები. დაახლოებით ერთი თვეა დარჩენილი. წლიური ანგარიშის განხილვის დროს გვექნება ძალიან დეტალური განხილვა ყველა პროცესის", - აღნიშნა ქადაგიძემ.

შეგახსენებთ საქართველოს ყოფილმა პრემიერ-მინისტრმა ეროვნული ბანკი კიდევ ერთხელ გააკრიტიკა. ივანიშვილის თქმით, ეროვნულმა ბანკმა ლარის კურსთან დაკავშირებით ჩარევა დააგვიანა და ეს პროცესი აჟიოტაჟში გადაიტანა.