არ შეეძლო და შარვლიდან ხტებოდა სააკაშვილი, მივიღეთ კატასტროფა 2008 წელს

არ შეეძლო და შარვლიდან ხტებოდა სააკაშვილი, მივიღეთ კატასტროფა 2008 წელს - ივანიშვილი

პოლიტიკა - 17:02, 20 Mar, 2015

1546

სამოქალაქო სექტორში გადასულმა ყოფილმა პრემიერ მინისტრმა, დღეს, კომენტარი საქართველოს სამეზობლო პოლიტიკასთან დაკავშირებითაც გააკეთა, ივანიშვილის შეფასებით საქართველომ თავის ყველა მეზობელთან ურთიერთობა მოლაპარაკებების გზით უნდა დაალაგოს.

მისივე თქმით, იმისთვის, რომ ოკუპირებულ ტერიტორიებთან მიმართებაში არაღიარების პოლიტიკა გაგრძელდეს, საერთაშორისო თანამეგობრობასთან ერთად დღევანდელი ხელისუფლება ყველაფერს აკეთებს.

„საერთო დამოკიდებულება უნდა იყოს ის, რომ მოლაპარაკებებით უნდა მოვახერხოთ და დავალაგოთ ჩვენს ყველა მეზობელთან ურთიერთობა და ყველა სახელმწიფოსთან, რომელთან ურთიერთობა გვაქვს.

ანექსიის გაღრმავების პროცესი გრძელდება. ჩვენ ვაკეთებთ ყველაფერს, ხელისუფლება აკეთებს ყველაფერს, რაც შეუძლია. აქაც სწორად უნდა შეაფასოთ - როგორც სამუშაო ადგილებზე, ეკონომიკაზე, რაც შეუძლია და ვერ აკეთებს, იქ უნდა გააკრიტიკოთ. ამის მაგალითი კარგი გვაქვს, რაც არ შეეძლო და შარვლიდან ხტებოდა სააკაშვილი, მივიღეთ კატასტროფა 2008 წელს.

დღეს რაც შეუძლია, ჩემი აზრით, ყველაფერს აკეთებს ხელისუფლება, საერთაშორისო თანამეგობრობასთან ერთად, მაქსიმალურად ახერხებს, რომ ჩვენი სიტუაცია იმ დონეზე მაინც დავიჭიროთ, რომ არაღიარების პროცესი გაგრძელდეს. რაც შეიძლება მაღლა უნდა ავწიოთ ეს თემა და დავიხმაროთ საერთაშორისო თანამეგობრობა, განუხრელად უნდა გავაგრძელოთ ის, რაც დაინერგა 2014 წლის თებერვლიდან“ - განაცხადა ივანიშვილმა.

ყოფილი პრემიერი სამოქალაქო განათლების ოლიმპიადის მეორე ტურის გამარჯვებულების დაჯილდოებას დაესწრო, რომელიც პარლამენტის ეროვნულ ბიბლიოთეკაში გაიმართა.