ნორვეგიის საგარეო საქმეთა მინისტრი არ აღიარებს რუსეთსა და საქართველოს ოკუპირებულ ტერიტორია - ცხინვალის რეგიონს შორის მიღებულ შეთანხმებას

„ის რომ რუსეთი მეკავშირეობისა და ინტეგრაციის შესახებ შეთანხმებებს აწერს ხელს საქართველოს სეპარატისტულ რეგიონებთან, სასიკეთო გავლენას არ ახდენს რეგიონში უსაფრთხოებისა და სტაბილურობის დამყარების მცდელობებზე. შეთანხმება არღვევს საქართველოს სუვერენიტეტსა და ტერიტორიულ მთლიანობას. ამიტომ, მკაცრად ვემიჯნები რუსეთსა და საქართველოს ოკუპირებულ ტერიტორია - ცხინვალის რეგიონს შორის მიღებულ შეთანხმებას" - განაცხადა საგარეო საქმეთა მინისტრმა ბორგე ბრენდემ.

მისი თქმით, შეთანხმება აუფასურებს იმ სამუშაოებს, რომლებიც საქართველოსა და სეპარატისტულ რეგიონებს შორის უსაფრთხოების უზრუნველყოფისა და კონფლიქტთან დაკავშირებული ჰუმანიტარული საკითხების მოგვარების მიმართულებით იქნა გაწეული.

„ნორვეგია მოუწოდებს რუსეთს, შეასრულოს 2008 წლის 12 აგვისტოსა და 2008 წლის 8 სექტემბრის შეთანხმებების პირობები. რუსეთმა ბათილად უნდა სცნოს საქართველოს ოკუპირებული ტერიტორიების დამოუკიდებელ სახელმწიფოებად აღიარება და გაიყვანოს სამხედრო ძალები საქართველოდან. ნორვეგია ურყევად უჭერს მხარს საქართველოს ტერიტორიულ მთლიანობასა და სუვერენიტეტს" -ამბობს ბრენდენი.