ზუგდიდის რაიონულ სასამართლოსთან აქციის მონაწილე ორი ქალბატონი დააკავეს

პოლიტიკა - 12:47, 19 Mar, 2015

2043

დღეს ზუგდიდის რაიონულ სასამართლოსთან ქურდულ სამყაროსთან კავშირში ბრალდებულების ოჯახის წევრებმა საპროტესტო აქცია გამართეს. ბრალდებულების სასამართლო პროცესი ამ წუთებში მიმდინარეობს. აქციის მონაწილეები სასამართლოზე ცრუ მოწმეების მიყვანას აპროტესტებენ და აცხადებდნენ, რომ ამ წუთებში იკითხებიან „ცრუ მოწმეები, რომლებიც რეალურად აცხადებენ იმას, რაც სამარათალდამცველებს და პროკურატურას სურს“.

საპროტესტო აქციაზე ინციდენტიც მოხდა, რის შედეგადაც აქციის მონაწილე ორი ქალბატონი დააკავეს. ერთს ბრალი საქართველოს ადმინისტრაციულ სამართალდარღვევათა კოდექსის 166-ე მუხლით ედება, რაც წვრილმან ხულიგნობას, საზოგადოებრივი წესრიგის დარღვევას გულისხმობს. მეორეს კი 173-ე მუხლით, რაც პოლიციის მიმართ დაუმორჩილებლობას გულისხმობს.

შსს-ს სამეგრელო-ზემო სვანეთის სამხარეო მთავარი სამმართველოს და ცენტრალური კრიმინალური პოლიციის დეპარტამენტის თანამშრომლებმა ფოთში, წალენჯიხაში, ზუგდიდში, სენაკში, თბილისსა და გორში ერთდროულად ჩატარებული ოპერატიულ-სამძებრო და საგამოძიებო ღონისძიებების შედეგად ქურდული სამყაროს წევრობის ბრალდებით 10 პირი გასული წლის 10 სექტემბერს დააკავა. „გამოძიებამ დაადგინა, რომ დაკავებულები ქურდულ სამყაროს აღიარებენ, სხვადასხვა სარგებლის მიღების მიზნით, ქურდული კანონების შესაბამისად, სპეციალური წესების დაცვით მოქმედებდნენ და მიზანმიმართულად ცდილობდნენ ქურდული სამყაროს ინტერესების საზოგადოებაში დანერგვასა და განმტკიცებას. გამოძიებამ ასევე დაადგინა, რომ დაკავებულები ქვეყნის გარეთ მყოფი კანონიერი ქურდების გავლენის ქვეშ იმყოფებოდნენ. ისინი ქურდული სამყაროს მაღალ იერარქიულ საფეხურზე მყოფი პირებისგან კონკრეტულ დავალებებს იღებდნენ და ასრულებდნენ.სამართალდამცველებმა დაკავებულების პირადი და საცხოვრებელი სახლების ჩხრეკისას სხვადასხვა ტიპის ცეცხლსასროლი იარაღები, ხელყუმბარა და ნარკოტიკული საშუალებები ამოიღეს. გამოძიება ქურდული სამყაროს წევრობის ფაქტზე მიმდინარეობს (საქართველოს სსკ-ის 223-ე პრიმა მუხლის 1-ლი ნაწილით)“, - ნათქვამია შინაგან საქმეთა სამინისტროს მიერ გავრცელებულ განცხადებაში.