პრემიერ-მინისტრის თქმით, ფოთში არასრულწლოვნებისთვის „ციხის კადრების“ ჩვენება მიზანმიმართულად მოხდა.

ამის შესახებ ირაკლი ღარიბაშვილმა მთავრობის სხდომაზე განაცხადა.

მისი თქმით, ფილმის ჩვენებაზე ბავშვების დასწრებაც „ნაციონალების“ მიერ იყო ორგანიზებული.

„ფოთში ორგანიზება გაუკეთეს „თავისუფალი ზონის“ მზარდამჭერებს, ბავშვებს, ახალგაზრდებს, სკოლის მოსწავლეებს და მოხდა მათი გამიზნულად მიყვანა და ამ ფილმის ჩვენება. შემდეგ აქცენტი გადაიტანეს იმაზე, რომ ბავშვები აღმოჩდნენ იმ დარბაზში და არა იმაზე, თუ როგორ ექცეოდნენ წლების განმავლობაში ბავშვებს ციხეებში. მოგეხსენებათ, რა ხდებოდა წლების განმავლობაში ციხეებში, როგორც სცემდნენ, აწამებდნენ და აუპატიურებდნენ ბავშვებს. მათ კი მთელი საზოგადოების ყურადღება, მათ შორის განათლების სამინისტროსი, მიმართეს სხვა მიმართულებით“, - განაცხადა პრემიერმა.

შეგახსენებთ, ტელეკომპანია "ოდიშის" ინფორმაციით, არასამთავრობო ორგანიზაციის "ყველა თაობა საქართველოსთვის" ხელმძღვანელის, გია სალუქვაძის ორგანიზებით ზუგდიდში, ფოთსა და ხობში დოკუმენტური ფილმის "სააკაშვილის სისხლიანი ქრონიკის" ჩვენება გაიმართა.

ნინო დათაშვილი