პრემიერი ცხინვალსა და რუსეთს შორის ე.წ. ხელშეკრულების გაფორმებას ეხმაურება და ამბობს, რომ ეს ანექსიისკენ გადადგმული კიდევ ერთი ნაბიჯია.

ამის შესახებ ირაკლი ღარიბაშვილმა მთავრობის სხდომაზე განაცხადა.

მისი თქმით, სამწუხაროა, რომ რუსეთმა რეგიონში სტაბილურობის შენარჩუნებისკენ ჩვენ მიერ გადადგმულ ნაბიჯს ასე უპასუხა.

„ე.წ. ხელშეკრულების ხელმოწერა არის საქართველოს ტერიტორიების ანექსიისკენ გადადგმული კიდევ ერთი ნაბიჯი. სამწუხაროა, რომ რუსეთმა ამგვარი ქმედებით უპასუხა რეგიონში სტაბილურობის შენარჩუნებისკენ ჩვენ მიერ გადადგმულ ნაბიჯებს. საქართველოს მთავრობა ნეგატიურად ვაფასებთ რუსეთის მიერ ცხინვალის ოკუპირებულ რეგიონთან ამგვარი არალეგიტიმური ხელშეკრულების გაფორმებას. ამ ფაქტს ასევე ნეგატიურად აფასებს თანამედროვე სამყაროც. ჩვენ ბოლო თვეების განმავლობაში მაქსიმალური გავაკეთეთ და მოვახერხეთ ის, რომ საერთაშორისო თანამეგობრობამ ცალსახად დაგმო როგორც ცხინვალთან, ისე აფხაზეთთან გაფორმებული მსგავსი ტიპის ე.წ. ხელშეკრულება“, - აღნიშნა ღარიბაშვილმა.

რუსეთის პრეზიდენტმა ვლადიმერ პუტინმა და ოკუპირებული ცხინვალის ე.წ პრეზიდენტმა ლეონიდ თიბილოვმა ე.წ მოკავშირეობისა და ინტეგრაციის ხელშეკრულებას ხელი კრემლში გუშინ მოაწერეს.

ხელშეკრულება ეკონომიკურ, სოციალურ, ჰუმანიტარულ და უსაფრთხოების სფეროში ურთიერთ თანამშრომლობას გულისხმობს.