რუსეთის საგარეო საქმეთა სამინისტრო ჟენევაში გამართულ მოლაპარაკებებს ეხმაურება

პოლიტიკა - 09:34, 19 Mar, 2015

935

ჟენევის მოლაპარაკებათა 31-ე რაუნდს რუსეთის საგარეო უწყება განცხადებით გამოეხმაურა. სამინისტროს განცხადებით, შეხვედრაზე აფხაზურმა და ოსურმა მხარეებმა საქართველოს ნატოში ინტეგრაციის გეგმების გამო შეშფოთება გამოთქვეს,

"აფხაზეთისა და სამხრეთ ოსეთის დელეგაციებმა გამოთქვეს შეშფოთება საქართველოს გეგმებზე ნატოსთან ინტეგრაციის თაობაზე. მათ აღნიშნეს, რომ ამ მიმართულებით სვლა წარმოადგენს პირდაპირ საფრთხეს ორი დამოუკიდებელი რესპუბლიკის მიმართ. განსაკუთრებით საგანგაშოა ალიანსის გეგმა საქართველოს ტერიტორიაზე ინფრასტრუქტურის განთავსებისა და სამხედრო წვრთნების ჩატარების შესახებ," – ნათქვამია განცხადებაში.

მხარეებმა დაკარგულ და ტყვეობაში მყოფ პირთა საკითხზეც იმსჯელეს. საუბარი შეეხო 18 მარტს მოსკოვსა და ცხინვალს შორის გაფორმებულ ხელშეკრულებასაც, რომელიც ლავროვის უწყების განცხადებით, მშვიდობიან ხასიათს ატარებს და სხვა ქვეყნების ინტერესების წინააღმდეგ მიმართული არ არის. "სამხრეთ ოსეთისა და აფხაზეთის დელეგაციებმა დევნილთა პრობლემების განხილვაზე უარი კიდევ ერთხელ თქვეს, მანამ, სანამ ქართული მხარე ამ საკითხის პოლიტიზირებას ახდენს,"-ნათქვამია განცხადებაში.

უწყება აღნიშნავს, რომ შეხვედრებისას ერთერთი პრიორიტეტული საკითხი ძალის გამოუყენებლობის შესახებ იურიდიული დოკუმენტის ხელმოწერა იყო, რასაც სოხუმი და ცხინვალი ითხოვს.