"თქვენი ხმამაღალი ტემბრი არავის აშინებს"- კურტანიძე ბობოხიძისგან ბოდიშს ითხოვს

პოლიტიკა - 19:35, 18 Mar, 2015

1864

პარლამენტის პლენარულ სხდომაზე დეპუტატებს შორის შელაპარაკება მოხდა. უმრავლესობის დეპუტატმა ლუკა კურტანიძემ, „ნაციონალური მოძრაობის“ წევრ აკაკი ბობოხიძეს „უმსგავსო საქციელის“ გამო ბოდიშის მოხდა და ტონის დაწევა მოსთხოვა. კურტანიძემ ბობოხიძე მას შემდეგ გააკრიტიკა რაც უმცირესობის დეპუტატმა განაცხადა, რომ საქართველოში ბავშვის სკოლაში შეყვანა 5-6 წლიდან უნდა იყოს შესაძლებელი. კურტანიძის თქმით კობახიძეს მომავალ თაობაზე ლაპარაკის მორალური უფლება არ აქვს:

"ბატონო კაკო, როცა გაქვთ პრეტენზია, რომ პარლამენტარი იყოთ და იმ საკითხებზე იმსჯელოთ, რასაც მომავალი თაობების აღზრდა ჰქვია, საზოგადოებას უნდა სცეთ პატივი, შემდეგ პარლამენტარიზმს უნდა სცეთ პატივი და თუ პრეტენზია გაქვთ, რომ სრულიად საქართველოს წარმომადგენელი იყოთ, მაშინ დედაზე გინება, უწმაწური სიტყვები, კოლეგების და სრულიად საქართველოს დამცირება, უადგილოა. ვფიქრობ, მორალურ მხარესაც ძალიან დიდი მნიშვნელობა აქვს. იმ შეცდომის შემდეგ, რაც თქვენ სრულიად საქართველოს გასაგონად მოგივიდათ, ვფიქრობ, ელემენტარულად უნდა გამოსულიყავით, ადამიანურად პატივი გეცათ კოლეგებისთვის, პატივი გეცათ მოსახლეობისთვის და შემდეგ გექნებოდათ მორალური უფლება, მომავალ თაობაზე გამოგეთქვათ მოსაზრებები. კიდევ ერთ შენიშვნას გეტყვით - თქვენი ხმამაღალი ტემბრი არავის აშინებს. გთხოვთ, ტონს დაუწიეთ. პატივი ეცით ქართველ ერს, რომელსაც ცხრა წლის განმავლობაში აუპატიურებდით და ამის შემდეგ ვილაპარაკოთ მომავალ თაობას 5 წლის და რვა თვის შემდეგ დავაწყებინოთ სკოლაში სიარული, თუ ექვსი წლიდან. ჯერ ბოდიში მოიხადეთ და შემდეგ ისაუბრეთ რიხიანად",- განაცხადა ლუკა კურტანიძემ.