ფინანსთა სამინისტროში, ევროკავშირსა და საქართველოს შორის ასოცირების შესახებ შეთანხმებით გათვალისწინებული საბაჟო ქვეკომიტეტის პირველი სხდომა გაიმართა.

სხდომის ფარგლებში ფინანსთა მინისტრმა ნოდარ ხადურმა შეხვედრა გამართა ევროკომისიის წარმომადგენლობით დელეგაციასთან, რომელსაც ევროკომისიის საბაჟო და საგადასახდო დირექტორატის დირექტორი ანტონის კასტრისიანაკისი ხელმძღვანელობს.

მონაწილეებმა განიხილეს შეთანხმებით გათვალისწინებული ვალდებულებების ეტაპობრივი დაახლოების პირველადი შედეგები.

მნიშნელოვანია, რომ სხდომის ფარგლებში მიიღეს ევროკავშირის მიერ შემოთავაზებული თანამშრომლობის ახალი დოკუმენტი - „საბაჟო სფეროში თანამშრომლობის სტრატეგიული ჩარჩო ფორმატი ევროკავშირსა და საქართველოს შორის,“ რომელსაც ევროკომისიის მხრიდან ხელს აწერენ ეკონომიკურ, ფინანსურ, საგადასახადო და საბაჟო საკითხთა კომისარი პიერ მოსკოვისი, ხოლო საქართველოს მხრიდან ფინანსთა მინისტრი ნოდარ ხადური.

ევროკავშირის მხრიდან შემოთავაზებული ეს დოკუმენტი გამოხატავს ევროკავშირის წევრი ქვეყნების მზადყოფნას, უფრო გააღრმავოს საქართველოსთან თანამშრომლობა. მსგავსი დოკუმენტი იგი უკვე მოქმედებს მოლდოვასა და უკრაინასთან. აღნიშნულ ეტაპზე ხდება ქართულ მხარესთან თანამშრომლობის ახალი პლატფორმის შემოთავაზება.

„საბაჟო ქვეკომიტეტის პირველ სხდომაზე ევროკავშირის მიერ შემოთავაზებული საქართველო-ევროკავშირს შორის საბაჟო სფეროში თანამშრომლობის ჩარჩო ფორმატის ხელმოწერა, ისტორიული მომენტია სავაჭრო ურთიერთობების დინამიური განვითარების პრაქტიკული ხელშეწყობის მიმართულებით. აღნიშნული ინიციატივა კიდევ ერთი ნათელი გამოვლინებაა იმ მხარდაჭერისა, რომელსაც ჩვენ ვიღებთ ევროკავშირისგან, ასევე, თვალსაჩინო დადასტურებაა ორივე მხარის ურყევი ნებისა, რომ მოხდეს საქართველოს კიდევ უფრო მეტი ინტეგრაცია ევროკავშირის პოლიტიკურ, ეკონომიკურ და სოციალურ სფეროებში. საქართველოს ფინანსთა სამინისტრო, როგორც დარგის განვითარებაზე პოლიტიკურად პასუხისმგებელი სამთავრობო დაწესებულება, ყოველ ღონეს ვიხმართ უფრო მდგრადი გავხადოთ საბაჟო სფეროში მიღწეული წარმატებები, მოვახდინოთ ინტენსიური კომუნიკაცია ბიზნეს საზოგადოებასთან და მოვუწოდოთ მათ, გამოიყენონ ყველა რესურსი ევროკავშირის სტანდარტების საკუთარ საქმიანობაში დანერგვისთვის. იმედს გამოვთქვამ, რომ ის საქმიანი ურთიერთობები, რომლის დაწყების საფუძველიც საბაჟო თანამშრომლობის ჩარჩო ფორმატია, მეგობრული ურთიერთობების გაღრმავების საწინდარი იქნება,“ - აღნიშნა ფინანსთა მინისტრმა ნოდარ ხადურმა.

ევროკავშირსა და საქართველოს შორის საბაჟო სფეროში თანამშრომლობის სტრატეგიული ჩარჩო ფორმატი ითვალისწინებს თანამშრომლობას სამი ძირითადი მიმართულებით: უსაფრთხო და მოქნილი სავაჭრო დერეფანი, რისკების მართვა, ინვესტირება საბაჟოს მოდერნიზებაში.