ვისთვის იყოს საწოლი განკუთვნილი - პრემიერის ადმინისტრაციის განამარტება რბილი ავეჯის შესყიდვაზე

პოლიტიკა - 15:12, 18 Mar, 2015

2427

მთავრობის ადმინისტრაციაში „ნაციონალური მოძრაობის“ მიერ გავრცელებულ ინფორმაციას ეხმაურებიან და განმარტავენ, რომ რბილი ავეჯი იმ სივრცისთვის შეიძინეს, რომელიც მაღალი რანგის სტუმრების მისაღებად მზადდება.

ამის შესახებ ჟურნალისტებთან ადმინისტრაციის უფროსმა მაია ცქიტიშვილმა განაცხადა.

მისი თქმით, ოპოზიციამ არასწორად გაავრცელა ინფორმაცია ავეჯის ფასებთან დაკავშირებითაც

„დეკემბერში გაფორმებული იქნა ორი ხელშეკრულება, რომელიც ავეჯის შესყიდვას შეეხებოდა. თუმცა ინფორმაცია არასწორად იყო წარმოდგენილი. ავეჯი არ არის შეძენილი პრემიერისთვის. ეს არის შეძენილი იმ სივრცისთვის, რომელიც ჩვენ დღეისთვის არ გვქონდა ადმინისტრაციაში. ჩვენ არ გვქონდა სივრცე, რომელიც მაღალი რაგნის სტუმრების მისაღებად იყო საჭირო. იცით, რომ პროტოკოლით არის გათვალისწინებული მთელი რიგი სხვადასხვა ფორმატები, რომელიც ითვალისწინებს როგორც პირველ პირების შეხვედრებს, ასევე მაღალი რანგის დელეგაციებს შორის შეხვედრებს. ჩვენ ვაწყობთ ადმინისტრაციაში ასეთ სივრცეებს, რომელსაც აღჭურვილობა სჭირდება. მათ არასწორიად ჰქონდათ ფასების შესახებ ინფორმაცია წარმოდგენილი. მაგალითად, სკამი, რომელზეც თქვეს, რომ 15 ათასი ლარი ღირდა, სინამდვილეში ამ ფასში შესყიდული იქნა 84 სკამი. რაც შეეხება ბატუტიან საწოლს, ესეც არასწორი ინფორმაციაა. ალბათ შეცდომით არის ნათარგმნი იტალურიდან. საწოლი ნამდვილად შევიძინეთ, მაგრამ ის არ ღირდა 24 ათასი ლარი, მისი ფასი 2200 ლარი იყო. საწოლი გათვალისწინებულია პირებისთვის, რომელსაც ხშირად დილის 4 საათამდე უწევს მუშაობა“, - ამბობს ცქიტიშვილი.

„ნაციონალურმა მოძრაობის“ ინფორმაციით, პრემიერმა 181 401 ლარის რბილი ავეჯი შეიძინა. ოპოზიციამ დღეს თვალსაჩინოებისთვის შეძენილი ავეჟის ფოტომასალაც გაასაჯაროვა.

შეგახსენებთ, მთავრობის მირ დაწყებული „ქამრები შემოჭერის პოლიტიკა“ საჯარო უწყებებისთვის რბილი ავეჯის შესყიდვაზე თანხების დაზოგვასაც გულისხმობდა.

ნინო დათაშვილი