ვაზიანის სამხედრო აეროდრომის ტერიტორიასა და სამხედრო პოლიგონზე 11-25 მაისს ქართულ-ამერიკული ერთობლივი სწავლება ჩატარდება. ამის შესახებ „ნიუპოსტს“ თავდაცვის სამინისტროში განუცხადეს.

მათი ინფორმაციით, სწავლება „ღირსეული პარტნიორი“ („Noble Partner“) საქართველოში პირველად ჩატარდება და ქართული ასეულის ნატოს სწრაფი რეაგირების ძალებთან დაახლოებას, ასევე ნატოს მომავალ ოპერაციებსა და წვრთნებში მონაწილეობის მისაღებად სრულყოფილად მზადყოფნას ისახავს მიზნად.

„ქართულ-ამერიკული ერთობლივი სწავლება ვაზიანის სამხედრო აეროდრომის ტერიტორიასა და სამხედრო პოლიგონზე 11-25 მაისს ჩატარდება. წვრთნაში საქართველოს შეიარაღებული ძალების I მსუბუქი ქვეითი ბრიგადის 12-ე ბატალიონის „ალფა“ ასეული, IV მექანიზირებული ბრიგადის 42-ე ბატალიონის I მექანიზირებული ასეული და სამხედრო პოლიციის ოცეული მიიღებს მონაწილეობას. ამერიკის მხრიდან სწავლებაში აშშ-ის არმიის ჯავშანტრანსპორტიორთა „ბრედლებისა“ და მედესანტეების ასეულები ჩაერთვებიან.

სწავლების ჩატარება 2014 წლის ოქტომბერში დაიგეგმა. ხოლო დაგეგმარების დასკვნითი კონფერენცია 2015 წლის 20-23 იანვარს გაიმართა“, - განმარტავენ უწყებაში.

ნინი კაციტაძე