პრემიერისთვის შეკვეთილი ავეჯის საფასური - ნაციონალები ახალ ფაქტებზე საუბრობენ

პოლიტიკა - 13:25, 18 Mar, 2015

1870

„ერთიანი ნაციონალური მოძრაობა“ მთავრობის ადმინისტრაციის მიერ იტალიაში შეკვეთილი რბილი ავეჯის შესახებ ფინანსურ ინფორმაციას აქვეყნებს.
ირმა ნადირაშვილის თქმით, ხელშეკრულება ორ კომპანიასთან არის გაფორმებული. ირმა ნადირაშვილი აცხადებს, რომ მთავრობის მოქმედება ეწინააღმდეგება დადგენილებას, რომელიც პრემიერ-მინისტრმა გამოსცა და რომლის თანახმადაც ფინანსური კრიზისის გამო უნდა შემცირებულიყო საოფისე ტექქნიკის, ინვენტარის და პირადი ჰიგიენის ხარჯები.
„მინდა შეგახსენოთ დადგენილების პროექტი, რომელსაც ხელს აწერს ირაკლი ღარიბაშვილი და სადაც წერია, რომ ფინანსური კრიზისიდან გამოსვლის მიზნით, მაქსიმალურად შეიზღუდოს რბილი ინვენტარის და უნიფორმის შეძენის და პირად ჰიგიენასთან დაკავშირებული საოფისე ტექნიკის და ინვენტარის ხარჯები. წარმოდგენილია ორი ხელშეკრულება, რომელიც ადასტურებს, რომ პრემიერ-მინისტრმა, ირაკლი ღარიბაშვილმა იტალიაში შეუკვეთა რბილი ავეჯი, რომლის შესყიდვაც თავისივე ხელმოწერით აკრძალა. ხელშეკრულება გაფორმებულია ორ კომპანიასთან Lifestyle-თან და იტალდიზაინთან (იხ. დანართი). მთელი ეს ავეჯი გადამხდელებს, საქართველოს მოსახლეობას, ბატუტზე მხტუნავი პრემიერის და მცურავი ლარის კურსის პირობებში, სულ დაუჯდა 181 401 ლარი. მთავრობას არ სურს, რომ თუნდაც ამ ელემენტარულ ფუფუნებაზე თქვას უარი. ეს მაგალითები ნათლად ადასტურებს, რამხელა უფსკრულია ხელისუფლების სიტყვასა და საქმეს შორის. ეს მაგალითები ნათლად ადასტურებს, რომ ჩვენ გვყავს მატყუარა მთავრობა, რომელის ამ საქციელით დასცინის ხალხს. ამიტომ საქართველოს მოსახლეობამ 21 მარტს ძალიან მკაცრი პასუხი უნდა გასცეს ხელისუფლების ასეთ აღვირახსნილ ქმედებას და მე ყველას მოვუწოდებ 21-ში რომ მობრძანდნენ აქციაზე.“- განაცხადა ირმა ნადირაშვილმა.