„ჟურნალისტებთან მაქვს თხოვნა, თქვენ შეგიძლიათ ერთ კონკრეტულ მაგალითზე, აღკვეთოთ ის, რაც დღეს ილიას სახელმწიფო უნივერსიტეტში ხდება“ - წერს ილიაუნის ყოფილი დეკანი გიორგი თუმანიშვილი „ფეისბუქის“ პირად გვერდზე და დახმარებსა შემდეგი პოსტით ითხოვს.

გიორგი თუმანიშვილი: „სამართლის ფაკულტეტზე მიმდინარეობს არაერთი კონკურსი პროფესორის თანამდებობებზე, ისე, რომ ინფორმაცია არის სრულიად დახურული.

1. ინფორმაცია ზოგიერთი კონკურსის შესახებ საერთოდ არ იყო განთავსებული უნივერსიტეტის ვებ-გვერდზე, შესაბამისად დაინტერესებულ პირებს საერთოდ არ მიეწოდათ ინფორმაცია ამ კონკურსების შესახებ.

2. რამოდენიმე კონკურსის შესახებ ინფორმაცია განთავსდა რამოდენიმე დღით და მერე საგანგებოდ წაიშალა უნივერსიტეტის ვებ-გვერდიდან.

3. დახურულია ინფორმაცია კონკურსებში მონაწილე კანდიდატების შესახებ.

ჟურნალისტებს გთხოვთ დაინტერესდეთ ამ საკითხით, დაუკავშირდეთ უნივერსიტეტისა და სამართლის ფაკულტეტის ადმინისტრაციას და სთხოვოთ გასცენ პასუხები თუ რატომ მიმდინარეობს კონკურსები ასეთ პირობებში.

რა არის ჩემი ინტერესი? ილიას სახელმწიფო უნივერსიტეტში სამართლის ფაკულტეტს ვქმნიდი 5 წლის განმავლობაში, ოთხი წელი ვხელმძღვანელობდი მას და დღეს უზომოდ მტკივა, როდესაც ვხედავ თუ რა ხდება.

თუ ,,კონკურსი’’ს წესით ,,არჩეული’’ იქნებიან უნივერსიტეტის ადმინისტრაციასთან დაახლოებული პირები, რომლებსაც მხოლოდ მათი გადაწყვეტილებების გამტარებელნი იქნებიან, უზომოდ დაზარალდებიან სტუდენტები, რომლებიც იხდიან სწავლის საფასურს იმისთვის, რომ მათ ასწავლონ დარგებში არსებულმა საუკეთესო პირებმა, ხოლო ეს პირები, არსებული ფორმატით (როდესაც ყოველგვარი ინფორმაცია დახურულია) განწირულნი არიან და ემსხვერპლებიან იმ ნეპოტიზმს, რომელსაც შეიძლება ჰქონდეს ადგილი. ამის პრევენცია, კი თქვენ - ჟურნალისტებს და საზოგადოებას შეუძლია, პროცესების მაქსიმალურად (შეძლებისდაგვარად) გამჭვირვალე ჩარჩოებში წარმართვის უზრუნველყოფით. ამიტომ, გთხოვთ დახმარებას" - წერს გიორგი თუმანიშვილი.