დღეს გაირკვევა დაიბარებენ თუ არა კანონმდებლები მთავარ პროკურორს პარლამენტში. „თავისუფალი დემოკრატების“ ინიციატივაზე ბიუროს სხდომაზე იმსჯელებენ.

გიორგი ბადაშვილის საკანონმდებლო ორგანოში დაბარება პროკურატურაში ახლად შექმნილ დეპარტამენტს უკავშირდება. მთავარი პროკურორის პარლამენტში დაბარების მომხრეა „ნაციონალური მოძრაობაც“.

როგორც დეპუტატები განმარტავენ, ახალ დეპარტამენტთან დაკავშირებით კითხვებია და მასზე ბადაშვილმა პასუხი უნდა გასცეს.

შეგახსენებთ, ცოტა ხნის წინ, მთავარ პროკურატურაში სამართალწარმოების პროცესში ჩადენილი დანაშაულის გამოძიების დეპარტამენტი შეიქმნა, რომელიც ორიენტირებული იქნება სამართალწარმოების მიმდინარეობისას და სასჯელის მოხდის პერიოდში ჩადენილი დანაშაულის გამოძიებაზე. სწორედ ამ ახალი უწყების შესახებ სურთ დეტალური ინფორმაციის მიღება დეპუტატებს.