ვაშინგტონი მოსკოვსა და ცხინვალს შორის გაფორმებულ არალეგიტიმურ, რაიმე სახის დოკუმენტის კანონიერებას არ აღიარებს. ამის შესახებ საგანგებო განცხადება აშშს სახელმწიფო დეპარტამენტის პრესმდივანმა ჯენ პსაკიმ გააკეთა.

ვაშინგტონი მოუწოდებს რუსეთს უარი თქვას საქართველოს რეგიონების აღიარებაზე და ასევე მხარს უჭერს ჟენევის მოლაპარაკებების ფორმატს.

ჯენ პსაკის განცხადებით, ე.წ. სამხრეთ ოსეთი და აფხაზეთი საქართველოს განუყოფელი ნაწილებია, აშშ კი საქართველოს ტერიტორიულ მთლიანობასა და სუვერენიტეტს მყარ მხარდაჭერას უცხადებს.

„შეერთებული შტატების პოზიცია სამხრეთ ოსეთთან და აფხაზეთთან დაკავშირებით ნათელია. ეს რეგიონები საქართველოს ტერიტორიის განუყოფელ ნაწილს წარმოადგენენ და ჩვენ განვაგრძობთ საქართველოს დამოუკიდებლობის, მისი სუვერენიტეტისა და ტერიტოერიული მთლიანობის მხარდაჭერას. რუსეთმა უნდა შეასრულოს ყველა ის ვალდებულება, რომელიც აიღო 2008 წლის ცეცხლის შეწყვეტის შეთანხმებით, გაიყვანოს ძალები კონფლიქტამდელ პოზიციებზე, უკან წაიღოს საქართველოს რეგიონების – სამხრეთ ოსეთისა და აფხაზეთის დამოუკიდებელ სახელმწიფოებად აღიარება და დაუშვას თავისუფალი წვდომა ამ რეგიონებში ჰუმანიტარულ დახმარებაზე,”-განაცხცადა ჯენ ფსაკმა.

აშშს სახელმწიფო დეპარტამენტის პრესმდივნის განმარტებით, არც ამჟამინდელი და არც წინა ხელშეკრულებები, რომელსაც ხელი 2014 წლის ნოემბერში მოეწერა, არ წარმოადგენს იურიდიული ძალის მქონე საერთაშორისო დოკუმენტებს.