"ეს არის მიზანმიმართული პროვოკაცია"- დაძაბული 31-ე რაუნდი ჟენევაში

პოლიტიკა - 18:32, 17 Mar, 2015

1272

ჟენევაში ოთხმხრივი შეხვედრის მოსამზადებელი პირველი ნაწილი დასრულდა. ქართული მხარე მოსკოვსა და ცხინვალს შორის ე.წ ხელშეკრულების გაფორმების დამთხვევას ჟენევის მოლაპარაკებების თარიღზე პროვოკაციად აფასებს და მოლაპარაკებების რაუნდის ჩაშლის საფრთხეზე ამახვილებს ყურადღებას.

„როგორც კი დაანონსდა რუსეთის მიერ ე.წ ხელშეკრულების ხელმოწერა, მე მაშინვე დავუკავშირდი თანათავმჯდომარეებს და ისინი საქმის კურსში ჩავაყენე. სხვა ახსნა ამას არ აქვს, ეს არის მიზანმიმართული პროვოკაცია, რომ ჩაიშალოს ეს რაუნდი და მთლიანად საფრთხე შეექმნას მოლაპარაკებების პროცესს,” - განაცხადა საქართველოს საგარეო საქმეთა მინისტრის პირველმა მოადგილემ დავით დონდუამ.

ჟენევაში ოთხმხრივი შეხვედრის მოსამზადებელი პირველი ნაწილი დასრულების შემდეგ საქართველოს ოკუპირებული რეგიონების დე ფაქტო მთავრობების წარმომადგენლებმა მედიასთან კომენტარის გაკეთება არ ისურვეს.

ვიაჩესლავ ჩიკირბას განცხადებით, ის კომენტარს მოლაპარაკებების დასრულების შემდეგ გააკეთებს:

„კომენტარს ხვალ გავაკეთებ“- განაცხადა ჩიკირბამ და ჟურნალისტებს ქართულად დაემშვიდობა.

ოკუპირებული ცხინვალის ე.წ პრეზიდენტის წარმომადგენელმა მურატ ჯიოევმა მედიასთან მოკლე კომენტარი გააკეთა და მოსკოვთან ე.წ ხელშეკრულების გაფორმების მიზეზად უსაფრთხოების უზრუნველყოფა დაასახელა:

„ჩვენ გვინდა, რომ ჩვენი უსაფრთხოება უზრუნველვყოთ, დანარჩენ კომენტარებს ხვალ გავაკეთებთ“- აღნიშნა ჯიოევმა.

შეგახსენებთ, ხვალ, 31-ე რაუნდის პარალელურად, მოსკოვსა და ცხინვალს შორის სამოკავშირეო თანამშრომლობის შესახებ ხელშეკრულების ხელმოწერის ცერემონია იმართება.

_{ნინო ზედგენიძე}