პარლამენტის თავმჯდომარე დავით უსუფაშვილი 21 მარტის აქციასთან დაკავშირებით შინაგან საქმეთა სამინისტროს განცხადებას დადებითად აფასებს.

მისი თქმით, ეს არის კარგი პრაქტიკა, როდესაც უწყება საკუთარ უფლებებს და მოვალეობებს ახსენებს აქციის ორგანიზატორებს, მოქალაქეებს და პოლიციელებს.

„ეს ძალიან კარგი პრაქტიკაა და ვისურვებდი, რომ ასეთი გაფრთხილებები თუ შეხსენებები ხშირად იყოს იმისთვის, რომ მოქალაქეებმა უკეთ იცოდნენ თავისი უფლებები, ასევე ამა თუ იმ აქციის ორგანიზატორებმაც და პოლიციამაც, რომლებიც ამ პროცესში არიან ჩართული. მეტი ინფორმირებულობა და კანონის მეტი განმარტება არის ხელისუფლების საქმე და ამოცანა," - განაცხადა დავით უსუფაშვილმა.

შინაგან საქმეთა სამინისტრო მოუწოდებს მოქალაქეებს, არ დაარღვიონ საზოგადოებრივი წესრიგი და კანონის ფარგლებში იმოქმედონ. უწყების მიერ გავრცელებულ განცხადებაში განმარტებულია შეკრების და მანიფესტაციის წესები.