ერთი ჯარისკაცის გამოკვება სახელმწიფოს 11-დან 15 ლარამდე უჯდება

პოლიტიკა - 14:39, 17 Mar, 2015

890

„სახელმწიფო კვებითი უზრუნველყოფის“ დირექტორმა მირანდა მანჯგალაძემ დღეს გამართულ პრესკონფერენციაზე ქართული ჯარის კვებაზე ისაუბრა. მანჯგალაძის თქმით, ერთი ჯარისკაცის კვებაზე სახელმწიფო დღეში 11-დან 15 ლარამდე ხარჯავს, კერძოდ სპეციალური ოპერაციის ძალებისთვის გამოყოფილია 15,87 ხოლო საჯარისო ნაწილისთვის 11,22 ლარი.

მანჯგალაძემ კომენტარი ჯარისკაცების უვნებელ კვებაზეც გააკეთა და აღნიშნა, რომ სამხედროების უვნებელი და კარგი კვების უზრუნველსაყოფად სტრატეგია უკვე შემუშავებულია.

"2013-2014 წლებიდან დაიწყო სასადილო ობიექტების გაუმჯობესება. ჩვენ ვგეგმავთ მედიის მიწვევას ერთ-ერთ სასადილოში, რომელიც ჩვენთვის და თავდაცვის სამინისტროსთვის სტანდარტია, რომლის მიხედვითაც ყველა სასადილო აშენდება. იცით, რომ იყო კრიზისული თემები, მათ შორის ჯვარედინი დაბინძურების პრობლემა, რადგან სასადილო ობიექტები არ იყო იმგვარად აშენებული და იმდენად რეკონსტრუქტურებული, რომ აღნიშნული თავიდან ყოფილიყო აცილებული. სხვათაშორის, ეს ჩვენ მემკვიდრეობით გვერგო, თუმცა 2013-2014 წლებში დაიწყო ამაზე მუშაობა და ეს პროცესი გრძელდება. ამის ნათელი მაგალითია ხონის ახალი სასადილო, რომელშიც გათვალისწინებულია ყველა ე.წ. დასავლური პრინციპი. ეს პროცესი, რა თქმა უნდა, ერთ დღეში ვერ დასრულდება, თუმცა ამ კუთხით მუშაობა მიმდინარეობს. მაგალითი გვაქვს, სტანდარტი შექმნილია რათა ეტაპობრივად მივაღწიოთ იმ შედეგს, რასაც ჰქვია ჯარის უვნებელი და კარგი კვება. ეს არის ე.წ. ევოლუციის პროცესი, რომლის ფარგლებშიც ეტაპობრივად მოხდება ჩანაცვლება იმის, რაც მემკვიდრეობით გვერგო", - აღნიშნა კომპანია "სახელმწიფო კვეთიბი უზრუნველყოფის" დირექტორმა.

ქართული ჯარის კვებას 2015 წლის 15 თებერვლიდან შპს "სახელმწიფო კვებითი უზრუნველყოფა" ახორციელებს.