პრემიერის განცხადებით, ვანო მერაბიშვილის მამას სურდა ერთ ლარად შეეძინა ის ტერიტორია, სადაც ასპინძაში განსაკუთრებულ დავალებათა სამხარეო სამმართველო გაიხსნა.

მისი თქმით, მერაბიშვილის მამამ მთავრობის ცვლილების გამო ეს ვერ მოახერხა.

„სანამ ბაზა გაკეთდებოდა ამ ადგილზე იყო მიტოვებული შენობა. ადრე იყო საბავშვო ბაღი, შემდეგ ვანო მერაბიშვილის მამას ამ შენობის, ამ ტერიტორიის შესყიდვა სურდა ერთ ლარად. სასტუმროს გაკეთება უნდოდა, მაგრამ ვერ მოასწრო. აქვე მინდა ავღნიშნო, რომ ამ რეგიონში არ იყო სპეცრაზმი, ამიტომ სამცხე-ჯავახეთის სამხარეო განსაკუთრებულ დავალებათა სამმართველოს გახსნა მნიშვნელოვანია, რადგან თითოეულმა მოქალაქემ თავი უფრო მეტად დაცულად იგრძნოს. ბოლო ორი წლის განმავლობაში ჩვენ ასზე მეტი ობიექტის რესტავრაცია და რეაბილიტაცია მოვახდინეთ. პრაქტიკულად ყველა სამხედრო ბაზა გარემონტდა და აღიჭურვა. სპეცრაზმელებს უფრო მეტი თანამედროვე შეიარაღება და ეკიპირება გადაეცათ. პოლიციელები და სპეცრაზმელები არიან განსაკუთრებული ხალხი. ისინი საკუთარი მოქალაქეების დასაცავად ტყვიაზე მიდიან. მათ დაფასება სჭირდებათ“, - განაცხადა ღარიბაშვილმა ასპინძაში განსაკუთრებულ დავალებათა სამხარეო სამმართველოს პრეზენტაციაზე ყოფნისას.